Rritja e çmimit të bukës ditë më parë në vendin tonë, si pasojë e rritjes së çmimit të miellit, solli shqetësim dhe reagime të ashpra nga qytetarët dhe jo vetëm.
Mirëpo, kjo shkelje nuk i ka bërë aspak përshtypje Autoritetit të Konkurrencës! Teksa të gjithë po prisnim ‘dënimin’, AK ka vendosur sot me 3 vota pro 2 kundër, të mos i gjobisë ndërmarrjet që merren me shitjen dhe tregtimin e miellit.Kompanitë janë : AgroBlend SHPK, Miell Tirana SHA, Bloja SHA, Atlas SHA dhe Atlas Mills SHPK.
Edhe pse kjo është një çështje mjaft problematike që rëndon në buxhetin e qytetarëve shqiptarë, kjo gjë duket se nuk e shqetëson fare Autoritetin Kombëtar të Konkurrencës, por bashkë me autoritetin dhe Arben Ahmetaj, i cili e ka mbështetur haptazi.
“Kam shumë besim tek Autoriteti i Konkurrencës, ata janë profesionistë në fushat e tyre dhe si një ent i pavarur e reskpetojë vendimin e tyre. Për sa më përket mua vendimi që kanë votuar se nuk ka monopol në tregun e miellit dhe nuk ka marrëveshje mes kompanive, praktikisht besoj se kanë bërë një investigim të thellë dhe kanë votuar me përgjegjësi profesionale dhe qytetare”, tha Ahmetaj
“Duke parë situatën e vështirë ekonomike në të cilën ndodhet Shqipëria prej shumë kohësh, sot Partia Demokratike, Komisoni i Ekonomisë, dorëzoi kërkesën për thirrje në Komision të Autoritetit të Konkurencës, pasi, jo më larg se dy ditë, ky autoritet me votën pro qeverisë, votoi kundër marrëveshjes së tregut të lirë, votoi kundër qytetarëve shqiptarë për uljen e çmimit të bukës dhe të miellit. Ky Autoritet cënon ndjeshëm mirëqënien e qytetarëve shqiptarë pasi vendimi për të mos gjobitur kompanitë të cilat cenojnë një produkt bazë siç është buka, po bëjnë përditë e më shumë vendime të cilat cënojnë jetën e qytetarëve”, tha nënkryetarja e Komisionit të Ekonomisë, Sorina Koti, e PD”, thuhet në deklaratë.
Kjo nuk është hera e parë që AK bën kaq hapur shkelje të tilla.
Shpeshherë kemi ngritur zërin para rasteve të ngjashme duke denoncuar shkeljet e AK, siç ju tregojmë më poshtë:
-Në lidhje me kompanitë celulare që abuzojnë dukshëm me çmimet;
-Bllokimi i dy laboratorëve Covid nga paktet e Manastirliut me koncesionarin Karathano
-Për shërbimin e testit të Covid-19 në laboratorët privat, që shkonte sa “qimet e kokës” me çmimin e vendosur me ‘marrëveshje’ nga laboratorët, prej 4000 lekësh të reja;
-Oligopoli në bërjen e tamponeve të Covid-19;
-Rasti i kreut të Përmbaruesve, i cili kërkonte të shpëtojë tregun agro-ushqimor nga gjoba 375 mijë USD për abuzimet me çmimet.
Ashtu si çështjet e lartpërmendura edhe ajo e bukës mesa duket nuk do të përbëjë ndryshim, duke qenë sërish populli shqiptar ai që do të vuajë mbi korrupsionin e kësaj strukture, aq më tepër kur Autoriteti i Konkurrencës ka mbështetjen e politikës.
