Mëngjesin e sotëm ka mbërritur në Gjykatën e Vlorës autori i masakrës së Selenicës, Ridvan Zykaj, i cili vrau 8 kushërinjtë e tij.
Në momentin që ai ka mbërritur para gjykatës kanë qenë të pranishëm familjarët e Olsi Hoxhallarit dhe nënës së tij, të cilët u dogjën disa muaj më parë nga gruaja e të ndjerit, e cila e kreu krimin në bashkëpunim me të dashurin e saj.
Ata kishin dalë para gjykatës me banderola ku kërkonin që si nusja e familjes së tyre që vrau burrin dhe vjehrrën, po ashtu edhe Ridvan Zykaj që vrau tetë kushërinjtë e tij duhet të dënohen me vdekje.
Autori i masakrës së Selenicës do të përballet sot me togat e zeza dhe do të jepet edhe masa e sigurisë për të.
Marrja në pyetje e të riut është bërë e vështirë pasi asnjë avokat nuk e merrte përsipër mbrojtjen e tij.
Vetëm ditën e djeshme është arritur të caktohet një avokat, ndërsa sot pritet që Gjykata e Vlorës të jap edhe masën e sigurisë për Ridvanin.
Burimi: Panorama
