Që ambasadorët amerikanë në Shqipëri janë shumë aktivë në jetën e kryeqytetit edhe përtej axhendës zyrtare, kjo dihet prej vitesh. Ata janë parë shpesh që të krijojnë miqësi me personazhe të ndryshëm nga politika shqiptare, apo nga bota e artit.
Dhe ndoshta vazhdon tradita e miqësisë së tyre me personazhet e muzikës shqiptare. Në kohën kur në Shqipëri në krye të Ambasadës amerikane ishte Alexander Arvizu, të gjithë e mësuam publikisht simpatinë e tij për muzikën dhe vokalin e këngëtares shkodrane, Rosela Gjylbegu.
Tashmë ndoshta ambasadori Lu mund të ketë zgjedhur këngëtaren dhe këngëtarin e tij të preferuar: Venera Lumanin dhe Lind Islamin.
Ose jo? Ai duket se nuk ka vendosur që të mbajë një qëndrim për më të preferuarën/in, pasi nga 2016-2017 i ka ndryshuar artistët me të cilën realizon këngën e fundvitit.
Ambasadori i SHBA-ve në vendin tonë, Donald Lu së bashku me 40 diplomatë amerikanë dhe anëtarë të personelit vendas kanë zgjedhur një këngë që është shumë festive dhe e përshtatshme për këto ditë.
Donald Lu shfaqet i veshur me kapuç, dorashka dhe shall duke kënduar “Jingle bells” në oborrin e Ambasadës amerikane në Tiranë.
Kënga e urimit për këtë fundvit, është realizuar në bashkëpunim me këngëtarët e njohur Venera Lumani dhe Lindi Islami. Ndërsa vitin e kaluar kënga erdhi në bashkëpunim me grupin Alar Band.
