Mbrëmë është shpërndarë kudo gjithandej një video ku shfaqej një burrë duke sulmuar fizikisht një grua në një supermarket në Prishtinë.
Nga pamjet e publikuara, ai shfaqet me një karrocë që përplaset me atë të një gruaje e cila kalon në anë të tij. Në atë moment mes të dyve nis një konflikt fillimisht verbal që përshkallëzohet në përdorimin e dhunës nga ana e të arrestuarit tanimë nga policia.
I njëjti u dërgua në mbajtje sipas një konfirmimi që u bë nga zëdhënësja Policisë së Kosovës, Flora Ahmeti.
Ndaj tij, Ahmeti më tej shtoi se i është iniciuar rasti ” Lëndim i lehtë trupor”.
Për ngjarjen që tronditi opinionin, reagimet në rrjete sociale kanë qenë të shumta duke përfshirë edhe artistët e famshëm shqiptarë.
Vesa Luma, Robert Berisha, Kejvina Kthella, Lindita Halimi, Alban Ramosaj, Lluni, Nushi – janë disa nga yjet që shprehën mllefin përmes postimeve që kanë shpërndarë në InstaStory.
Policia ka bërë të ditur se i dyshuari është arrestuar dhe ndaj tij është iniciuar rasti “Lëndim i lehtë trupor”.
Në këtë rast natyrshëm lind pyetja si ka mundësi që ligji mbron këto raste kaq brutale që japin një pamje kaq shumë trishtuese të cënimit të jetës, asaj që duhet të mbrohet më shumë nga ligji.
Mos vallë këto persona nuk i druhen as ligjeve dhe as ligjvënësve ndaj dhe rastet e raportimit të dhunës në Kosovë sa vijnë dhe rriten?
