Portieri i Partizanit, Alban Hoxha, përfundoi në prangat e uniformave blu mbrëmjen e së shtunës. Arsyeja e arrestimit sipas njoftimit zyrtar të policisë ishte drejtimi i makinës në gjendje të dehur.
Ndërsa ishte planifikuar që seanca gjyqësore për portierin të mbahej sot, mësohet se u shty për nesër në orën 10:00, kur Hoxha do të njihet me masën e sigurisë.
Tani vjen dhe reagimi i parë nga skuadra e tij, pas një prononcimi të shkurtër që zëdhënësi për shtyp i të kuqve, Olsi Ranxhi, bëri për “Panorama Sport”.
Ai tha se, klubi është në dijeni të çështjes dhe drejtuesit po interesohen për sqarimin e situatës së kapitenit Hoxha.
“Klubi është në dijeni të çështjes dhe drejtuesit po interesohen për sqarimin e situatës së portierit. Për momentin nuk mund të themi më shumë”, u shpreh Ranxhi.
Policia njoftoi të dielën se 31-vjeçari u arrestua pasi në rrugën e “George W. Bush”, pasi ishte duke drejtuar në gjendje të dehur mjetin.
Albani është përfolur prej kohësh për lidhjen e tij me këngëtaren Çiljeta Xhilaga, por pas një videoje të publikuar nga internet, ku shfaqej me një femër misterioze në një klub, këngëtarja fshiu nga llogaria e saj në Instagram çdo postim me të dhe e ka hequr futbollistin e njohur nga lista e ndjekësve. Tashmë thuhet nëpër portale se çifti nuk është më bashkë.
