Ish-ylli i Barcelonës dhe PSG-së, Ronaldinho është arrestuar pasi akuzohet poseidim të dokumentacionit të rremë.
Legjenda e Brazilit është vënë në pranga në Paraguai, pasi dyshohet se ka përdorur dokumente false për të hyrë në vendin e Amerikës së Jugut.
39-vjeçari, i cili fitoi Kupën e Botës me Brazilin në vitin 2002, u arrestua në Resort Yacht & Golf Club Paraguayo së bashku me vëllain e tij Roberto mbrëmjen e së mërkurës, ka konfirmuar Ministria e Brendshme e Paraguait.
Sipas La Nacion, në hotel u gjetën pasaporta që mbanin emrat Ronaldinho dhe Roberto me kombësi të Paraguait.
Një deklaratë zyrtare nga policia paraguaiane kishte zbuluar më parë se Ronaldinho ishte ftuar në Paraguai nga pronari i kazinosë Nelson Belotti.
Ronaldinho aktualisht është pa pasaportë braziliane për shkak të një gjobe mjedisore që mori në 2018-n.
Ish-ylli i Barcelonës dhe vëllai i tij u dënuan për ndërtim të paligjshëm të një gracke peshkimi në Liqenin Guaiba në 2015-n, pa licencën e duhur në një zonë të mbrojtur.
Pavarësisht se nuk ishte në gjendje të udhëtonte jashtë Brazilit, Ronaldinho u caktua si një nga ambasadorët e rinj të vendit për turizmin, në shtatorin e vitit të kaluar.
I bllokuar në atdheun e tij, ish-ylli i Milanit tha në atë kohë se ai po përpiqej të shfrytëzonte sa më shumë situatën e tij, pasi pranoi një rol për të promovuar turizmin e Brazilit.
“Turizmi është shumë i rëndësishëm për krijimin e vendeve të punës dhe rifitimin e imazhit tonë ndërkombëtarisht”, tha Ronaldinho në fjalimin e tij si ambasador.
/Goal.com
