Shumë persona gjykohen për blerjen e rrobave të dorës së dytë, apo siç njihen në Shqipëri të përdorura, dhe për këtë arsye e mbajnë të fshehtë këtë fakt. Mirëpo ka nga ata personazhe që nuk e kanë aspak problem ta pranojnë.
Edhe blogerja Armina Mevlani ka treguar ditën e sotme në emisionin “Shqipëria Live” se ka blerë rroba të përdorura. Madje ajo ka ndarë me të gjithë edhe një histori që i ka ndodhur në Los Angeles.
“Kur isha në Los Angeles në një dyqan të ‘Vintage’ pëlqeva shumë një fustan të viteve ’50, por nuk e mora dhe kur pashë një vajzë që e mori fillova të qaja. Kur ka pasur gjëra që më kanë pëlqyer e kam blerë, nuk më ka bërë përshtypje që kanë qenë të përdorura. Ato kanë një farë vlere, mund ta kem marrë edhe për ta pasur si vepër arti”, u shpreh Armina.
Sot ajo është një ndër blogeret më të njohura në Shqipëri dhe frymëzon qindra vajza me stilin e saj. Armina ka qenë e ftuar edhe në vende të ndryshme të botës për të ndjekur sfilata mode të markave më të njohura.
