Emisioni “E Diela Shqiptare” është një ndër programet më të ndjekura nga shqiptarët, që me rubrikat interesante na mban të mbërthyer pas ekranit çdo të diel. Mirëpo me nisjen e sezonit të ri sikurse edhe është paralajmëruar, “E diela Shqiptare” do të ndryshojë skenografinë e saj.
Ardit Gjebrea nëpërmjet një fotoje të publikuar në Instagram ka lajmëruar ndjekësit e tij se tashmë kanë nisur punimet për studion e re.
“Po fillon një studio e re të ndërtohet. ‘E Diela Shqiptare’ në sezonin e ardhshëm, me shtëpi të re”, shkruan Ardit Gjebrea.
Ky ndryshim i studios së emisionit “E Diela Shqiptare”, vjen pas 10 vitesh dhe do të bëhet nga profesor Gaetano Castelli.
Disa muaj më parë një burim zbuloi për “iconstyle.al” se skenografia e re e spektaklit do të jetë shumë teknologjike, ku baza do të jetë ndriçimi.
Gjithçka do të riformatohet tek “E diela Shqiptare”, që nga skenografia e deri tek rubrikat, ndërsa të njëjtë do të mbeten pa dyshim publiku dhe Ardit Gjebrea.
Surprizat e shumta që na presin tek emisioni “E diela Shqiptare” do të zbulohen në muajin shtator me nisjen e sezonit të ri.
