“Apple” zbuloi më në fund përse disa telefona celularë IPhone 6s fiken papritur. Muajin që shkoi, kompania ofroi ndërrimin pa pagesë të baterisë për ata përdorues të cilëve telefoni u fiket si pasojë e një defekti.
Dje kompania publikoi në sajtin zyrtar të “Apple”-it në Kinë, se shkaku i këtij problemi është mbajtja e disa baterive për një kohë më të gjatë se sa duhet në ambient të hapur.
Gjatë prodhimit të një pjese të telefonave, bateritë e tyre u ekspozuan më gjatë se sa duhej ndaj ajrit.
Mosmbajtja në kushtet ideale të prodhimit bën që këto bateri të degradojnë më shpejt dhe të fiken papritur.
“Apple” gjithashtu theksoi në sajtin zyrtar se jo gjithmonë fikja e papritur lidhet me baterinë. iPhone është programuar në mënyrë të atillë që të fiket kur ekspozohet në temperatura tepër të ulëta, apo tepër të larta, në mënyrë që të mbrohet telefoni.
Burimi: Daily Mail
