Një nga aktivitetet më të bukura dimërore pritet që të realizohet më 9 shkurt nga Agjencia e Parqeve dhe Rekreacionit.
Po flasim për “Dajti n’Fest” që është cilësuar ndryshe si një jehonë që i bëhet ditës së maleve.
APR në bashkëpunim me Agjencinë Kombëtare të Zonave të Mbrojtura dhe “EDS Foundation” nxjerrin nga sënduku i kullave malësore doket dhe zakonet, kostumet, rrëfenjat, zejet, veshjet tradicionale të qëndisura me mjeshtëri nga duarartët e zonave të ndryshme, dhe i bëjnë pjesë të festës.
Kjo festë çdo vit e më shumë po i mbledh qytetarët në Dajt për të kaluar një fundjavë ndryshe mes aktiviteteve të larmishme festive.
Në aktivitetin “Dajti n’Fest 2019”, prej mëngjesit e deri në perëndim, qytetarët do të mund të shijojnë natyrën e Dajtit, të argëtohen në tingujt e muzikës dhe në aktivitetet e ndryshme sportive, si dhe të shijojnë nga afër tradicionalen dhe zahiretë e mrekullueshme të dimrit.
Kështu që bëni mirë që këtë fundjavë të mos planifikoni asgjë!
