Ministrja e Arsimit Besa Shahini ka bërë me dije zyrtarisht se këtë vit nuk do të ketë mbrëmje mature për shkak të rregullave të distancimit social që duhet të zbatohen në kohë pandemie.
Pyetjes se “nëse do të ketë mbrëmje të maturës sivjet”, ajo iu përgjigj kështu: “Për fat të keq, jo. Mbrëmjet e maturës nuk do të lejohen. Janë festa që nuk mundësojnë distancimin social mes nxënësve, kështu që sivjet ato duhet të anulohen dhe të gjejmë forma të tjera për të festuar”.
Në komunikimin e radhës, Besa Shahini njoftoi se duke filluar nga data 4 maj do të ketë komunikime të përditshme nga ana e Rezana Vrapit, drejtore e Qendrës së Shërbimeve Arsimore (QSHA) mbi elemente dhe detaje të ndryshme të provimeve.
“Paralelisht, platforma akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, të cilat do t’i transmetojnë në RTSH. Kështu që, jam e bindur që sivjet do të jeni më të përgatitur se kurrë më parë për të bërë provimin e maturës”.
Përsa i përket rikthimit në shkollë më 18 maj të maturantëve, ministrja ka sqaruar se nuk është i detyrueshëm. Maturantët mund të punojnë individualisht në shtëpitë e tyre, pa bërë konsultim, mjafton të njoftojnë drejtorin e shkollës.
“Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë”.
