Ish-presidenti amerikan George Herbert Walker Bush, ka ndërruar jetë në moshën 94-vjeçare. Ishte djali i tij, George W. Bush, i cili përmes një deklarate për shtyp njoftoi vdekjen e së atit:
“Jeb, Neil, Marvin, Doro dhe unë jemi të trishtuar të njoftojmë se pas 94 vitesh, babai ynë i dashur ka ndërruar jetë. George H. W. Bush ishte një burrë i mrekullushëm dhe babai më i mirë që një djalë apo vajzë mund të kërkonte. E gjithë familja Bush është shumë falenderuese ndaj të gjithë atyre që janë lutur për babain dhe ndaj të gjitha mesazheve të ngushëllimeve nga miqtë dhe qytetarët”- shkruante djali i tij në deklaratë.
Bashkëshortja e tij prej 73 vitesh, Barbara Bush, ndërroi jetë me 17 prill në moshën 92-vjeçare. Gjatë funeralit të saj, Bush përshëndeti të gjithë nga karrigia me rrota, pasi prej disa kohësh ishte diagnostifikuar me sëmundjen e Parkinsonit.
George Bush Sr, siç ishte i njohur ishte presidenti i 41-të i SHBA midis 1989 dhe 1993, disa vite pasi shërbeu në detyrë si zëvendës-president nën presidencën e Ronald Reagan në dy mandate.
Pavarësisht popullaritetit, ai u akuzua për shpërfillje të çështjeve të brendshme dhe u mund nga Bill Klinton në zgjedhjet e vitit 1992.
Burimi: Enews
