Ambasada amerikane ka njoftuar të gjithë të interesuarit për vizat jo-emigruese, se janë anuluar të gjitha intervistat e paracaktuara, deri më 3 prill.
Në një njoftim në Facebook, ambasada bën me dije se gjatë kësaj kohe do të procesojë vetëm takimet urgjente për viza jo-emigruese.
Ndërkohë, procesimi i vizave imigruese dhe shërbimet për qytetarët amerikanë do të vazhdojnë pa ndërprerje, thuhet në njoftim.
Masat e ndërmarra nga ambasada vijnë në kuadër të përpjekjeve të qeverisë shqiptare për të parandaluar përhapjen e Koronavirusit, i cili ka shkaktuar viktimën e parë në vend dhe ka infektuar 23 persona të tjerë deri më tani.
Njoftimi i plotë:
Në mbështetje të përpjekjeve të qeverisë së Shqipërisë për të parandaluar përhapjen e mëtejshme të COVID-19 duke kufizuar grumbullimet publike dhe praktikimin e largësisë midis personave, Ambasada e SHBA ka anuluar të gjitha intervistat e paracaktuara për Viza Jo-Emigruese deri më 3 prill, 2020. Gjatë kësaj kohe, Ambasada do të procesojë vetëm takimet urgjente për Viza Jo-Emigruese. Procesimi i Vizave Imigruese dhe shërbimet për qytetarët amerikanë do të vazhdojnë pa ndërprerje. Në përputhje me përpjekjet e qeverisë së Shqipërisë për të zvogëluar përhapjen e COVID-19, Ambasada e Shteteve të Bashkuara ka vendosur të shtyjë ose anulojë të gjitha aktivitetet dhe mbledhjet e ardhshme publike deri në 3 Prill 2020.
Lexoni njoftimin e plotë të Ambasadës së SHBA dhe përditësime të tjera mbi COVID-19.
