Altin Basha është drejtori i ri i Teatrit Kombëtr Eksperimental “Kujtim Spahivogli” dhe në një konferencë për mediat ka prezantuar platformën e tij. Ai u shpreh se fokusi i tij kryesor do të jetë tek të rinjtë, pra për t’ju dhënë më shumë mundësi aktorëve e regjisorëve që dalin nga bannkat e shkollës.
“Pas thirrjes së hapur për të konkurruar, pas konkursit. Mendoj se kam një farë eksperience në teatrin e pavarur, edhe mendoj se është një gjenerator i ideve të reja. Në vazhdimësi jam përpjek që të gjej mekanizma se si mund të reformohet fryma e kërkimit. Nëse ka një mekanizëm të stabilizuar qe mund ta bëjë këtë formë, qe mund të ndiqet nga alternativa të pavarura, ky është TKES. E gjithë eksperienca që kam unë me tentativat e mia, qëkur kam nis punën, me studentë dhe artistë të rinj, mendoj që ta shtrijë dhe në TKES. Është puna ajo që flet më gjatë, kjo do të ndodh ne grup, se thelbi i një teatri është në grup”, tha Basha.
Në konferencë ishte e pranishme edhe ministrja e Kulturës, Elva Margariti dhe ish-drejtori i Teatrit Eksperimental, Kiço Londo. Ky i fundit u shpreh i keqardhur që duhet të lërë këtë detyrë, duke e cilësuar teatrin si shtëpinë e tij të dytë.
“Nuk dua që ta fsheh që ndihem i trishtuar që më duhet për shkak te respektimit te institucioneve të largohem nga kjo shërbesë dhe t’i lë vendin drejtorit pasardhës. Ndihem sikur më kanë larguar nga shtëpia ime. Unë nuk jam drejtor, s’kam qenë ndonjëherë drejtor, sepse drejtorët nuk janë si unë”, tha Kiço Londo, duke falenderuar gjithë bashkëpuntorët e këtij rrugëtimi.
Londo drejtoi TKES për 6 vite me radhë, ndërsa Basha ka qenë për 17 vite regjisor i spektaklit të humorit, “Portokalli”, nga i cili hoqi dorë këtë vit.
