Ish-miss Shqipëria, Almeda Abazi dhe aktori i famshëm turk, Tolgahan Sayisman, kanë kurorëzuar në martesë lidhjen e tyre.
Çifti u martua në Los Angeles të Shteteve të Bashkuara të Amerikës, pikërisht në ditën e ditëlindjes së bukuroshes shqiptare dhe një ditë para Shën Valentinit, më 13 shkurt.
Ceremonia martesore u zhvillua në një tarracë në Beverly Hills, me 40 të ftuar, kryesisht familjarë dhe miq të ngushtë.
Velloja që kishte veshur Almeda ishte e gjatë në pjesën e pasme, ndërsa fustani tradicional i bardhë i ngushtë pas trupit.
Aktori i njohur turk kishte bërë një postim në rrjetin social Instagram, për këtë moment shumë të rëndësishëm në jetën e tij.
“Ta duash një njeri me zemër është që buzëqeshja e saj të të duket agim i ditës. Të gjesh një person që t’i kujton të gjitha bukuritë e krijuesit, është bekim më vete. Zoti bëftë që të gjithë ju të jeni bashkë me njerëz me të cilët të plakeni dorë për dore, me njerëz që t’i lëshoni gjethet e kohës plot dashuri. Le të jetë ky postimi me të cilin i jap lamtumirën beqarisë”, ka shkruar Sayisman.
