“Kam punuar 14 vjeç me plumbat që më fluturonin në majë të kokës se ishte luftë në Shqipëri! Po, po e marrosur, i ikja mamit që 14 vjeç për të shkuar në Radio. Ja kjo ishte ëndrra ime…”
Kështu i ka përshkruar pak kohë më parë Alketa Vejsiu hapat e saj të parë në botën e medias.
Si një 14-vjeçare e dashuruar me mikrofonin dhe e etur për t’u bërë pjesë e ndryshimit që media shqiptare po pësonte e që lindi disa prej figurave që sot janë emra me peshë në botën e televizionit.
Por Alketa 14-vjeçare me siguri nuk do ta kishte parashikuar dot rrjedhën që mori karriera e saj me kalimin e viteve, duke u shndërruar padyshim në një prej emrave më të dashur për publikun shqiptar falë formateve të shumta të spektakleve argëtuese që ka sjellë në ekranin shqiptar.
Por një kthesë “e majtë” në rrugëtimin e saj duket se ka zbehur disi shkëlqimin e personazhit që përgjatë gjithë këtyre viteve, përveçse aftësive të saj të padiskutueshme prej prezantueseje, është përpjekur gjithnjë të përcjellë vetëm një gjë: POZITIVITET.
Këtë kthesë në karrierën e saj e shënoi Festivali i Fundvitit në RTSH, ku Alketa, përveçse u diskutua gjerë e gjatë për reagimin e saj pas fitores së Arilenës ku praktikisht përçmoi festivalin që kishte organizuar vetë (lexo këtu), u shndërrua në temë diskutimi në rrjetet sociale për performancat e saj të këndimit të cilësuara si të tepruara (lexo këtu), si dhe për faktin që në tre netë, ndërroi plot 12 fustane, që duhet thënë, nuk janë pak.
Dy detajet e fundit u bënë shkas dhe për ironizime të shumta, ku ranë në sy ai i Xhemi Shehut e Salsano Rrapit si dhe i Marina Vjollcës në “Klanifornia” që duket se hapën portat e ferrit për një hedhje e pritje thumbimesh që vijojnë prej më shumë se 2 javësh, që sërish duhet thënë, nuk janë pak në një vend ku çudia më e madhe zgjat 3 ditë.
Teksa të gjithë po mendonin se Alketa si gjithnjë do të ruante qetësinë e do t’i kalonte në heshtje “me ose pa hatërmbetje” këto thumbime, katër ditë më parë, shenjat e para të hakmarrjes filluan të shfaqen në Revistën Class, në pronësi të Vejsiut, që ndër vite është përpjekur t’i qëndrojë besnike domethënies së emrit dhe filozofisë së Alketës mbi pozitivitetin. Në rrjedhën e lajmeve të postuara në Insta Story, shfaqen këto dy imazhe:
Fill pas tyre, dy pyetje ku audiencës i kërkohej të jepte mendim për Olti Currin si dhe për prezantuesen më të keqe shqiptare.
Fakti që dy fotot në fjalë u fshinë vetëm pak minuta pasi u publikuan, , mund të bënte këdo të mendonte se dikush mund të kishte hack-uar Instagramin e revistës, por nuk ishte ky rasti.
Postimet për Xhemin dhe motrat Vjollca do të rishfaqeshin në Instagramin e faqes sërish dy ditë më pas, disi më të moderuara si rezultat i atij që duket si një proces reflektimi jo dhe aq paqësor.
Megjithatë, kushdo që ideoi postimet që shkonin deri në kufi të denigrimit të maskuar me një sens humori jo dhe aq bindës, me siguri nuk e kishte pritur një reagim aq masiv.
Në vetëm pak minuta, kanë vërshuar me dhjetra komente që akuzonin Alketën për “veprime të ulëta” sidomos ndaj koleges Xhemi Shehu e cila ironizohej jo dhe aq lehtë për një ndryshim të aluduar emri nga Xhemile në Xhemi (që ajo vetë e ka mohuar) e deri tek aftësitë profesionale.
Si kurrë më parë, Vejsiu, e konsideruar si një nga figurat më të dashura të ekranit shqiptar, u sulmua në mënyrë të pamëshirshme në rrjetet sociale për qëndrimin që për hir të së vërtetës, është shumë larg Alketës që të gjithë kemi njohur në ekran.
Një situatë e tillë, bëri që më në fund dikush të dilte e të merrte përgjegjësi. Komentet negative përveçse nisën të fshiheshin pjesërisht, nisën dhe të merrnin replika nga llogaria e revistës. Në këto replika, një vajzë e quajtur Xhesi i shpjegonte komentuesëve se në fakt Alketa ia kishte deleguar asaj revistën e se postimet në fjalë nuk ishin asgjë tjetër veçse humor i saji, duke ndjekur pikërisht shembullin e Xhemit.
A do të thotë kjo se deri në atë moment të gjithë iu vërsulën pa të drejtë Alketës duke e akuzuar si “promovuese të bulizmit”?
E vërteta është se në një botë virtuale që të lejon të fshehësh fytyrën pas një ikone, edhe komentuesit e irrituar mund ta kenë pasur gabim, ndonënse këtë me siguri nuk do ta dimë dot kurrë.
Megjithatë, e drejtë apo jo, ky reagim i ka kushtuar disa marrëdhënie Vejsiut, përfshirë edhe shoqëri të këputura.
Mbrëmjen e djeshme, përshkrimi i postimit me motrat Vjollca u fshi si pasojë e një telefonate jo dhe aq miqësore që Getoar Selimi i ka bërë Alketës, ndonëse kjo e fundit fillimisht ka refuzuar të përgjigjet, siç ka raportuar Revista Anabel (lexo këtu).
Nga një kontroll në Instagram na rezulton se Luana dhe Marina nuk e ndjekin më prezantuesen në Instagram, ndonëse në 2017 Vejsiu ndoqi hap pas hapi organizimin e dasmës së tyre e madje ajo dhe Marina udhëtuan së bashku në Itali për të përzgjedhur fustanin e saj të nusërisë.
Pjesë e debatit së fundmi është bërë dhe aktori Rezart Veleshnja që për t’i dalë në mbrojtje mikeshës së tij Xhemi Shehut, ka publikuar një foto të disa viteve më parë të Alketës, duke e ulur edhe më tej nivelin e diskutimit (lexo këtu).
Gjithashtu, një tjetër emër që ka rënë në sy mes replikave që Xhesi e Revistës Class i ka kthyer komentuesëve, është dhe emri i Ardit Gjebreas. “[Xhemi Shehu] të imitojë njëherë Arditin dhe Arbanën…”-shkruhej në komentin që duket se konfirmon dhe zërat për një prishje të marrëdhënieve mes saj e Ardit Gjebreas, për një konkurrencë të mundshme mes “Fest58” dhe “Kënga Magjike”.
Por teksa rrjetet sociale vijojnë të vlojnë nga ky debat, Alketa duket se kësaj here ka zgjedhur vërtet të qëndrojë në prapaskenë, teksa të gjithë janë sy e veshë për reagimin e saj të parë pas kësaj meseleje virtuale që në fund të ditës, mund të mos mbajë aspak firmën e saj.
