Thirrja e Alketa Vejsiut për të ndihmuar ta mbajë premtimin që t’i japë një shtëpi vogëlushit Xhejson Bafti, hapi një debat të madh në rrjetet sociale. Ndaj moderatores pati komente të shumta, një pjesë e mirë e tyre jo fort positive, se përse të mos kontribuojnë në ndihmë të Xhejsonit, vetë stafi i Piter Panit. Dhe sikur të mos mjaftonin ato, një reagim nga ana e Olti Currit u pasua nga një sërë hedhje- pritjesh mes tij dhe Alketa Vejsiut. (lexoje këtu)
Por sot, në fillim të spektaklit “Në Kurthin e Piter Pan” në Klan, Alketa Vejsiu iu përgjigj të gjithave publikisht me një fjalim, teksa mes lotësh kërkonte shpjegimin përse ky reagim nga ana e njerëzve, kur ajo po nisej nga një qëllim i mirë.
“Edhe unë kam jetuar në një shtëpi që fuste ujë”,- rrëfeu Alketa, e cila vijoi të kujtonte se pavarësisht se fëmijëria e saj ka qenë e vështirë, ajo ia ka dalë t’i bëjë ëndrrat realitet duke mos hequr dorë. Dhe, siç vijoi më tej, ishte pikërisht kjo një prej arsyeve të forta që e kishin shtyrë të kërkonte ndihmë për Xhejsonin, pasi tek ai shikon një fëmijë të talentuar që mund t’ia dalë të bëhet dikush nëse gjen mbështetjen e duhur.
Pas këtij fjalimi, u transmetua një insert ku tregoheshin kushtet aspak të shëndetshme të shtëpisë ku jeton Xhejsoni bashkë me familjen e tij, në fshatin Mushqetë të Tiranës, klip i cili shërben edhe si mesazh sensibilizues që njerëzit ta ndihmojnë Xhejsonin të bëhet me një shtëpi të re.
“Po deklaroj këtu, se një pjesë të pagesës që më është akorduar nga televizioni Klan për drejtimin e “Kurthit të Piter Pan”, e dhuroj në ndihme të Xhejsonit dhe familjes së tij.”, ishte premtimi i Alketës, duke iu përgjigjur kështu akuzave se po e kanalizon bamirësinë vetëm tek kontribuesit e tjerë.
