Rudina Xhunga ka folur për jetën e saj private dhe fillimet e karrierës së saj si gazetare.
E ftuar në ‘My Living’ në “Vizion Plus”, Rudina ka falenderuar regjisoren e njohur Vera Grabocka e cila në një moment i kishte dalë në krah pasi Aleksandër Frangaj donte ta largonte nga puna.
Në atë kohë Rudina punonte në një revistë, ku Vera i mësoi profesionin. Por një ditë pas një problemi me një artikull, kryeredaktori e hoqi nga puna dhe Vera Grabocka i doli në krah duke pranuar se fajin e kishte ajo.
“E kam takuar shumë hershëm, qëkur isha gazetare kulture te Koha Jonë, te Aleanca. Vera më mësoi A-në e profesionit, që ti mund ta dish, por dikush duhet të ta thotë. Ca gjëra ti i di, por pa t’i vënë dikush në dukje është pak më e vështirë. Më thanë një moment që unë po bëja një shkrim me shumë pasion që nuk më përkiste. ‘Përse nxjerr me duart e tua gënjeshtrat e të tjerëve,’ më tha. ‘Mos e bëj kurrë, je shumë e talentuar. Pse e djeg veten?”, ka rrëfyer Rudina .
“Pastaj në një moment tjetër, nuk e harroj kurrë, ai ka qenë një moment shumë i vështirë. Mbaj mend që pata një problem në punë dhe më hoqën nga puna. Punoja te një revistë, Aksi. Më hoqi nga puna kryeredaktori i revistës për një shkrim që duhet të dorëzoja për Verën. Ajo erdhi me mua, mori me vete Timon, shkuan te Aleksandër Frangaj dhe i thanë: ‘Rudina nuk e ka fajin, e kemi ne’. Që atëherë i jam mirënjohëse”, përfundoi gazetarja.
/Newsbomb
