Ndërkohë që qeveria e Ramës nuk e ka vënë ende ujin në zjarr për ecurinë e mediave në vend, pas krizës ekonomike me pandeminë e koronavirusit, qeveria në detyrë e Kosovës e ka bërë hapin e parë në këtë drejtim!
Kryeministri në detyrë, Albin Kurti ka bërë me dije se pakoja fiskale e qeverisë së Kosovës mund të përfshijë edhe gazetarët e vendit, për t’iu ardhur në ndihmë pas krizës ekonomike për shkak të koronavirusit.
Gjatë vizitës në komunën e Ferizajt, Albin Kurti u pyet nga gazetarët, nëse do të mund të përfshijë në planin e ndihmës ekonomike edhe median, dhe kreu i qeverisë u shpreh pozitiv për një zhvillim të tillë.
Kurti bëri të ditur se qeveria në detyrë ka aprovuar aktualisht një masë shumë të rëndësishme në formën e një pakoje fiskale emergjente për ato kategori më në nevojë, por ende jo për gazetarët dhe grupe të tjera që kanë nevojë gjithashtu për financim.
Ai theksoi se bashkë me ministrin e Financave do të adresojë në vijim edhe çështjen e gazetarëve në mënyrë që edhe këta të fundit t’i përfshijë në planin ekonomik:
“Është e vërtetë që ne i kemi mbështetur të gjitha llojet e uniformave që janë në krye të detyrës në këtë luftë të përbashkët, ato të kaltëra të policisë, ato të bardha të mjekëve dhe infermierëve; ato të gjelbëra të pjesëtarëve të ndryshëm që janë duke kontribuar në parandalimin e shpërndarjes së koronavirusit, mirëpo pakoja jonë fiskale dhe emergjente është ciklike. Ne nuk kemi bërë një paketë për të gjithë vitin, por vetëm për këtë muaj, e muajin tjetër dhe eventualisht edhe muajin më vonë, sepse shpresoj që do të dalim nga kjo krizë. Por pajtohem që duhet të adresojmë këtë çështje me qeverinë në detyrë, me ministrin e Financave në mënyrë që të shohim që edhe ata që nuk i kemi përfshirë si punëtorët e pastrimit, shoferët dhe në këtë rast edhe gazetarët gjithashtu t’i përfshijmë”.
Kështu, pas Greqisë e cila do të përfshijë në paketën e fundit mbështetëse nga qeveria edhe gazetarët, Kosova bëhet shteti i radhës që thekson rëndësinë e mbështetjes financiare të mediave në këtë periudhë të vështirë për to.
Ndërkohë, qeveria shqiptare nuk ka parashikuar asnjë ndihmë për mediat në planin financiar për përballimin e krizës së shkaktuar nga koronavirusi në Shqipëri.
Mediat aktualisht janë në krizë: gazetat print kanë ndaluar botimin, disa media audio-vizive dhe online kanë pezulluar përkohësisht pagat e gazetarëve, e të tjera kanë nisur reduktimin e pagave të disa punonjësve për të përballluar situatën.
Thirrjet e mediave, përfshi atë të përsëritur të iconstyle.al (lexo këtu), reagimin e Shoqatës së Gazetarëve Europianë, apo Unionit të Gazetarëve, deri tani kanë rënë në vesh të shurdhër.
“Përsa i përket mediave, unë mendoj që nuk është detyra e qeverisë të financojë ecurinë e programeve komerciale. Detyra e qeverisë është që të garantojë minimumin jetik të medias përsa i përket lirisë së informacionit dhe të drejtës për informim”, u shpreh Rama më herët.
/Iconstyle.al
