Shpesh, Albi Nako bullizohet për fytyrën nga ndjekësit e tij, diçka kjo që e deklaroi vetë koreografi. Jo pak herë ai merr mesazhe fyese, madje tepër të rënda. I ftuar sot përmes një lidhjeje në Skype për “Wake Up”, Nako do të shprehej kështu:
“Sa herë publikoj foto apo video vijnë mesazhe fyese. Unë nuk e mbaj veten për të bukur dhe njerëzit janë kapur me lëkurën dhe fytyrën time. Unë kam një fytyrë pa filtra. Shpresoj që hallet e shqiptarëve të jenë te fytyra ime”.
Emri Albi Nako do të pushtonte titujt të shumtë përgjatë ditëve të shkuara, nisur nga një koment i tij në emisionin “Just Dance” më 24 janar, drejtuar Belës, një konkurrenteje 40-vjeçare.
“Më dukesh si personazh tipik i atyre filmave “Planeti i majmunëve”. Mendoj që je në një moshë që më mirë martohu dhe bëj fëmijë, sesa të vazhdosh këtu”, u shpreh Nako, anëtar i jurisë së emisionit.
Deklarata në fjalë zemëroi opinionin publik, çka e detyroi artistin të kërkonte publikisht ndjesë. Lidhur me çështjen në fjalë, Nako rrëfeu për “Wake Up” se vazhdon të marrë mesazhe negative nga ndjekësit, madje edhe mallkime.
“E vërteta është se nuk e di nëse në Top Channel hyra me këmbën e djathtë apo të majtë. Në atë emision, bëra një marrëveshje të plotë me konkurrenten, sepse njihemi prej 15 vitesh dhe lëshova atë batutë. Unë mundohem të jem vetvetja. Prisja të kishte reagim minimalist, por batuta ime ndaj konkurrentes ishte galaktike dhe u ndesha me një sërë ofendimesh. Ajo çfarë më bëri përshtypje është se shkuan deri në mallkime. Edhe sot e kësaj dite më vijnë mesazhe. Unë asaj vajze doja t’i bëja një promo sepse e njoh prej vitesh. Është e vuajtur dhe është mësuese gjimnastike në Korçë dhe i thashë që do të të them një batutë të tillë dhe patëm një marrëveshje”, tha koreografi.
Përpos koreografit, kritika të shumta mori edhe moderatorja Dojna Mema, që sipas ndjekësve heshti dhe nuk doli në mbrojtje të Belës. Kështu, Mema kërkoi gjithashtu ndjesë:
“Një herë të vetme nuk arrita të bëhem zëri juaj. Distancohem nga një deklaratë e tillë. Kërkoj ndjesë që nuk reagova në kohë, por pak më vonë. Seksizmi nuk prek vetëm vajzat, çfarëdolloj seksizmi është i dënuar”, u shpreh Dojna.
