Emisioni “Fiks fare” ka denoncuar mbrëmjen e djeshme një fenomen mjaft shqetësues për shoqërinë shqiptare. Ai solli rastin tronditës se si një rrjet pedofilësh abuzojnë me fëmijë të mitur në Shqipëri dhe në Kosovë përmes rrjeteve sociale. Ndërkohë që ky fenomen po lulëzon nga dita në ditë, në vendin tonë mungon një ligj kundër pedofilisë në rrjetet sociale.
Në emisionin “Fiks Fare” u trajtua rasti konkret i një 40-vjeçari, i cili përdorte Facebook-un për të ngacmuar të mitur, kryesisht djem, të cilëve iu kërkonte favore seksuale.
40-vjeçari kishte mbi 4000 miq në Facebook , ku 80% e tyre ishin minorenë. Për të vërtetuar veprimet e turpshme qe ai bënte ndaj të miturve, gazetarët e “Fiks Fare”, hapën 2 llogari në Facebook, të një vajze dhe të një djali, përkatësisht nga 13-vjeç. Bisedat mes të miturve të supozuar dhe 40-vjeçarit nëpërmjet Facebook-ut bëheshin gjithnjë e më seksuale. Ai i tregonte minorenit veprimet që do t’i bënte për t’i hequr turpin dhe kur djali vononte në kthimin e përgjigjeve, ai e merrte vazhdimisht në telefon përmes Facebook-ut.
E njëjta situatë u paraqit edhe në bisedat me vajzën, të cilën e pyeste nëse ishte ose jo e virgjër. Pas interesimit të emisionit rreth kësaj çështjeje të rëndë, Drejtoria e Përgjithshme e Policisë është shprehur se për ta është e ndaluar të stimulojnë raste të tilla, për të arritur tek abuzuesit.
Nga ana tjetër, Vasilika Hysi, nënkryetarja e Komisionit të Ligjeve është shprehur se situata është tepër e rëndë dhe duhet ndryshuar menjëherë.
Burimi: Top Channel
