Prokurori i Përgjithshëm i Teksasit, Ken Paxton, ka nisur një hetim ndaj kompanisë së njohur të veshjeve sportive Lululemon, nën dyshimet se mund të ketë mashtruar konsumatorët në lidhje me përmbajtjen e produkteve të saj.
Sipas njoftimit zyrtar, zyra e Paxton ka lëshuar një Kërkesë Hetimore Civile për të verifikuar nëse veshjet e kompanisë përmbajnë të ashtuquajturat “kimikate të përhershme” (PFAS) substanca toksike që njihen për rezistencën ndaj ujit dhe djersës, por që janë lidhur me probleme serioze shëndetësore.
Autoritetet në Teksas do të analizojnë gjithashtu listën e substancave të kufizuara të Lululemon, protokollet e testimit dhe praktikat e zinxhirit të furnizimit, për të kuptuar nëse kompania ka respektuar standardet dhe transparencën ndaj konsumatorëve.
“Amerikanët nuk duhet të shqetësohen nëse po mashtrohen kur përpiqen të bëjnë zgjedhje të shëndetshme për veten dhe familjet e tyre,” deklaroi Paxton. Ai theksoi se çdo kompani që shet produkte të dëmshme nën maskën e mirëqenies do të përballet me pasoja ligjore.
Nga ana tjetër, Lululemon ka mohuar kategorikisht akuzat, duke deklaruar se nuk përdor PFAS në produktet e saj që prej vitit fiskal 2023. Sipas kompanisë, këto substanca janë hequr gradualisht nga produktet rezistente ndaj ujit dhe furnitorët e saj i nënshtrohen testimeve të rregullta nga palë të treta për të garantuar përputhshmërinë.
“Ne po bashkëpunojmë plotësisht me hetimin dhe mbetemi të përkushtuar ndaj standardeve të larta të sigurisë,” theksoi kompania në reagimin e saj.
Ky zhvillim vjen në një moment politik të ndjeshëm për Paxton, i cili është i përfshirë në një garë të fortë për Senatin e Teksasit. Hetimi është mirëpritur nga disa grupe aktivistësh, veçanërisht nga lëvizja “Make America Healthy Again”, e cila shpreh shqetësime për përdorimin e kimikateve toksike.
Megjithatë, ekspertë dhe aktivistë mjedisorë kanë kritikuar fokusin e hetimit, duke argumentuar se problemet më të mëdha me PFAS në Teksas lidhen me ndotjen nga biosolidet në bujqësi, të cilat mund të përhapin këto substanca në tokë dhe ujë.
PFAS janë një grup kimikatesh që lidhen me sëmundje serioze si kanceri, çrregullimet e sistemit imunitar dhe problemet e fertilitetit, dhe përhapja e tyre në mjedis është kthyer në një shqetësim global. Hetimi ndaj Lululemon pritet të hedhë më shumë dritë mbi përdorimin e këtyre substancave në industrinë e modës sportive dhe mbi transparencën e kompanive ndaj konsumatorëve.
