Mbretëria e Bashkuar njoftoi që në fillim të muajit prill se po tërhiqte nga tregu vezët Kinder Surprise, pasi u konstatua se përmbante salmonelë.
Në këtë vend u regjistruan 125 raste të helmimit, ndaj alarmi u ngrit në mbarë botën dhe shumë shtete morën masa.
Në Mbretërinë e Bashkuar, Francë, Gjermani, Holandë, Belgjikë, Kosovë, Maqedoni, Irlandë dhe Suedi u tërhoqën nga tregu të gjitha produktet e vezës Kinder Surprise, ndërkohë që AKU në vendin tonë doli me deklaratë se produktet Kinder që qarkullojnë në tregun shqiptar janë të sigurta.
Ndërkohë sot, si gjithmonë me vonesë dhe pa përgjegjësi për jetën dhe shëndetin e qytetarëve shqiptarë, Autoriteti Kombëtar i Ushqimit është kujtuar për rrezikun që kanoset nga konsumimi i këtyre produkteve dhe ka dalë në njoftim zyrtar ku bën thirrje të shmanget blerja e produkteve të çokollatave Kinder.
Autoriteti Kombëtar i Ushqimit
AKU vijon procedurën e tërheqjes nga tregu të produkteve që RASSF ka evidentuar. AKU njofton dhe këshillon konsumatorët që të shmangin blerjen e produkteve të mëposhtme dhe nëse kanë blerë të mos konsumojnë produktet e listuara:
KINDER SCHOKOBONS (të gjitha llojet e tyre)
KINDER SCHOKOBONS të gjitha lotet për paketimin 125 g
KINDER SORPRESA MAXI të gjitha lotet për paketimin 100 g
KINDER MAXI MIX te gjitha lotet për paketimin 133 g
Në një pikë inspektimi kufitar është paraqitur subjekt për import produktesh çokollate Kinder dhe bazuar në kontrollin dokumentar e identitar rezultoi se ngarkesa kishte produkt, për të cilin kompania prodhuese ka njoftuar se duhet tërhequr nga tregu.
Autoriteti Kombëtar i Ushqimit ka proceduar me refuzim në kufi për ngarkesën e kthim në vendin e origjinës.
Sigurojmë konsumatorët se drejtoritë rajonale dhe trupat inspektuese në terren dhe në pikat e inspektimit kufitar janë në monitorim dhe ndjekje të situatës dhe për çdo zhvillim do të kryhet njoftimi i konsumatorëve.
