Aktorja shqiptare, Rudina Dembacaj, e cila është e njohur për rolin e saj si ish-kryetarja e Kuvendit, Jozefina Topalli, ka rrëfyer se dikur ka qenë plot 89 kilogramë dhe i pëlqente alkooli.
E ftuar në “Pasdite në Top Channel”, Rudina tregoi historinë e saj të veçantë të dobësimit, kur ajo ishte studente. Aktorja nuk zgjodhi një dietolog për të rënë nga pesha, por falë vullnetit të hekurt, ajo nisi të informohej rreth kalorive dhe vlerave të ushqimit dhe rrëzoi 35 kg në 3 vjet.
Rudina më parë jetonte në Shkodër dhe siç tregoi, kishte një traditë bashkë me xhaxhain, që pinin bashkë raki. Alkooli siç dihet është një ndër shkaktarët e mbipeshës, ndaj Rudina vendosi ta eliminonte. Ajo gjithashtu tregoi se mban një regjim të rregullt, dhe se është ushtruar në palestër për të ardhur në peshën ideale.
“Kur isha studente në Shkodër isha 89 kile. Shoqet më thonin që duhet të dobësohesha, motra po ashtu. Nuk u konsultova me dietologë, u kujdesa për veten time. Fillova të lexoja për karbohidratet dhe proteinat, bëhesh vet doktor i vetes. Mua më pëlqente dhe alkooli atëherë. Ulesha me xhaxhain dhe pija raki”, tha Rudina.
