Alban Ukaj është një aktor me origjinë nga Prishtina por që jeton në Sarajevë. Së fundmi, raportohet se ai po merr pjesë në Festivalin e Kanës.
Aktori i njohur është i pranishëm së bashku me pjesëtarët e tjerë të filmit të titulluar “Tori et Lokita”.
Filmi ka në fokus pikërisht problemet që kanë të rinjtë në Belgjikë pas largimit nga Afrika.
Pjesë e kastit janë: Claire Bodson, Charlotte De Bruyne, Tijmen Govaerts, Mbundu Joely, Nadege Ouedraogo, Pablo Schils, Baptiste Sornin dhe Marc Zinga.
Ukaj dha një intervistë për France TV ku foli për Jean-Pierre Dardenne dhe Luc Dardenne: “Vëllezërit Dardenne janë mësues, miq të mirë dhe regjisorë të mëdhenj. Ata janë ndër intelektualët më të mëdhenj që njoh. Kam kaluar një shkollë të re aktrimi me ta. Kur punon me ta, nuk është aq e rëndësishme të mendosh për skenat individuale, por rëndësinë e gjithë historisë”.
Më tej, ai tha se është i lumtur që ka punuar me një grup njerëzish që nuk kanë frikë të thonë me zë të lartë atë që mendojnë.
“Jam i lumtur që kam pasur mundësinë të punoj me njerëz që janë kaq të fuqishëm dhe që nuk kanë frikë të thonë me zë të lartë atë që mendojnë. Ata flasin për pakicat, domethënë njerëzit në margjina”.
