Vetëm para pak orësh kryebashkiaku i Tiranës Erion Veliaj njoftoi se më në fund ka arritur një marrëveshje me aktorët për rindërtimin e Teatrit Kombëtar.
Kjo çështje e cila prej disa javësh ka alarmuar aktorët e teatrit u duk se po përfundonte me një marrëveshje ku Veliaj kishte rënë dakort që të mos prekej asnjë centimetër nga trualli i teatrit, por vetëm do të zgjerohej.
Aktori Alfred Trebicka i cili ishte i pranishëm sot në mbledhjen me Veliajn tha se po negociohej dhe akoma nuk kishte një marrëveshje përfundimtare.
Megjithatë pas kësaj duket se aktori i njohur Neritan Liçaj është revoltuar dhe ka reaguar përmes një statusi në Facebook ku kërkon të mbrohen vlerat e Teatrit Kombëtar dhe fton qytetarët të marrin pjesë në një protestë për mbrojtjen e tij.
“Miq! Teatri nuk preket!
Si vazhdues i frymës qytetare të profesorëve të mi Agim Qirjaqi,Vangjush Furrxhi,Robert Ndrenika e shumë e shumë të tjerëve. Në mbrojtje të vlerave më të mira të trashëgimisë kulturore,pronës publike ku bën pjesë dhe Teatri Kombëtar, kundër politikës së korruptuar,mafjes së betonit,propagandës dhe gënjeshtrave ditën për diell, ju ftoj të gjithëve pa përjashtim të mblidhemi në teatër në orën19.00 për të mbrojtur dinjitetin tonë qytetar.
Nuk jemi të shitur, as tradhtojmë ne artistët. Nuk jemi lodra partish për këtë ju siguroj.Duam vetëm të na dëgjoni dhe mbështesni ju shqiptarë pa përjashtim, pa të cilët ne nuk jemi asgjë. #mbrovetenmbroteatrin” – shkruan Liçaj në postimin e tij në Facebook.
