Pas 12 vitesh martesë aktori i famshëm amerikan, Nicolas Cage dhe bashkëshortja e tij, Alice Kim janë divorcuar. Zëdhënësi i aktorit tha për revistën “People” se, çifti jetonte i ndarë prej muajit janar. Çifti i cili festoi përvjetorin e 12-të të martesës në gusht, kanë edhe një djalë 10-vjeçar Kal-el Coppola Cage.
Aktori 52-vjeçar e ka njohur bashkëshorten e tij në vitin 2004, teksa ajo punonte kamariere në një restorant që ai frekuentonte shpesh. Dy muaj më vonë ata u fejuan dhe më pas u martuan në një ceremoni private në Kaliforninë e Veriut. Arsyet e divorcit të tij të tretë nuk dihen ende, por përfaqësuesi i tij ka konfirmuar se çifti nuk janë më bashkë.
Kjo ishte martesa e tretë e aktorit e cila përfundon në divorc. Aktori më parë ka qenë i martuar me Lisa Marie Presley për 4 muaj dhe me Patricia Arquette për 5 vjet.
Nicolas ka gjithashtu edhe një djalë 25-vjeçar nga lidhja e tij e shkurtër me ish-modelen Christina Fulton.
Burimi: People
