Artistët janë të vendosur që mos të hapin rrugë për shembjen e Teatrit Kombëtar dhe nëse qeveria vendos të mos t’i dëgjojë me bashkëbisedime, ata do të gjejnë forma të tjera për të treguar qëndresën e tyre.
“Kryeministri të mos mendojë se e ka fituar luftën!”, kështu u shpreh aktori i mirënjohur, Arben Derhemi dhe kreu i Sindikatës së Artistëve të Teatrit Kombëtar.
Pak javë më parë ai prezantoi Aleancën Qytetare për Mbrojtjen e TK-së, e cila fton të bëhet pjesë e saj çdo intelektual dhe qytetar i këtij vendi.
Derhemi e quan vjedhje të pastër atë që po ndodh me truallin e TK-së, duke e krahasuar me vjedhjen e bregdetit shqiptar.
Duke theksuar se kjo është një vjedhje e hapur në mes të Tiranës, në sy të të gjithëve, ai thotë, se nuk do të ketë asnjë lëshim nga ana e Aleancës, madje do shkohet deri në grevë urie.
Ai i bën thirrje çdo qytetari që do të mbrojë historinë e qytetit të tij, të bëhet pjesë e takimeve të çdo të hëne, brenda apo jashtë ambienteve të TK-së.
“Ne do të shkojmë deri në grevë urie, do të flijohemi brenda asaj ndërtese”, shprehet ai.
Lidhur me pyetjen pse ishin kujtuar kaq vonë, ai tha:
“E vërtetë është, por nuk e menduam kështu. Ne nuk e dinim kaq malinj kryeministrin dhe gjithë Rilindjen shqiptare. Po bën veprime antikombëtare dhe në një moment të caktuar ne e kuptuam logjikën e tij dhe pse po e bënte këtë. Por nuk duhet të mendojë se e ka fituar luftën”.
