Forcat Speciale të RENEA-s kanë plagosur me armë zjarri në kokë Haxhi Likën, 77 vjeç, në fshatin Remas të Lushnjes, gjatë një operacioni që po kryenin në zonë. Mirëpo, sipas të afërmve të 77-vjeçarit, RENEA ka qëlluar me armë në kohën që ky i fundit ndodhej në gjumë. Bashkëshortja e tij, ndodhet në të njëjtën dhomë me të.
‘Qemë në gjumë të dy anë dritares aty, ku di unë ça bënë, nuk mbaj as mend, por që na zgjunë, ishte e papritur (qan) nuk e di si qe. Ne në punën tonë’. –tregon ajo për “ABC News”.
“Të vish në 4 të mëngjesit të ngrihesh nga gjumi. Ne thamë ça ishte kjo zhurmë sikur dhe kriminelë të kishim qenë ne, jo ashtu. Shteti është shtet, bjer kartën e identitetit nëse kërkon njeri, shikonte mua çunin, tjetrin.” – tregon një tjetër familjar.
“Na erdhi policia terror, në orën 5 të mëngjesit terror, qëlluan me armë na plagosi të tërëve, na ktheu me fytyrë pas murit, na vendosi prangat. E vranë xhaxhain në gjumë” – u shpreh familjari i 77-vjeçarit.
Ndërsa Policia e Shtetit ka reaguar me anë të një njoftimi për shtyp në lidhje me ngjarjen. Policia njofton se gjatë planit operacional për kapjen e dy të dyshuarve për vrasje, të cilët fshiheshin në banesën e 77- vjeçarit, ky i fundit thirrjes së policisë i është përgjigjur me armë. Haxhi Lika sipas policisë ka dalë në dritare me armë gjahu.
Plagosja e 77-vjeçarit mbetet në rrethana të paqarta sipas policisë. Ai ndodhet i shtruar në Spitalin Ushtarak të Tiranës.
Pas këtij operacioni policia ka ndaluar dy djemtë e të plagosurit , vëllezërit Martin dhe Arben Lika.
Sipas Policisë së Shtetit, është marrë informacion se në banesën e të moshuarit Lika strehoheshin dy shtetas të dyshuar si autorë vrasjesh.
