Aida Shtino është fiksuar në memorien e të gjithëve me programin shumë të ndjekur “Njerëz të humbur”. Një format i suksesshëm, por që jo kushdo ka guximin ta marrë përsipër. Pas historive që publikoheshin në këtë emision në shumicën e rasteve fshiheshin trafikantë, të cilët nuk e kishin problem të kërcënonin me jetë gazetaren apo stafin organizativ të këtij emisioni.
Vështirësitë e bërjes së “Njerëz të humbur” ishin të mëdha, por ato u dyfishuan për gazetaren e njohur pasi u shoqëruan edhe me një situatë familjare të komplikuar. Pas shumë vitesh martesë Aida u divorcua nga bashkëshorti, me të cilin ka edhe një djalë.
Pas 3 vitesh mungesë në ekran moderatorja e njohur ishte e ftuar në “Pasdite në Top Channel”, nga ku rrëfeu vështirësitë e jetës private dhe të emisionit që i përloti të gjithë.
“Çdo divorc që bëjmë në jetë është i vështirë dhe nuk e përjeton mirë. Edhe kur je publik, je në qendër të vëmendjes. Për mua ishte e vështirë, sepse djalin e kisha adoleshent. Nuk e përballuam aq shëndetshëm, por gjithsesi kaloi, ashtu siç kalon çdo fazë në jetë. Tashmë kanë kaluar 7 vjet, secili ka ndjekur rrugën e tij”, tha Aida.
Kjo ishte një periudhë shumë e vështirë, ndërkohë që të gjithë ishin kuriozë të dinin se çfarë po ndodhte në jetën e saj private.
“Në fakt, atë periudhë e kam mbyllur telefonin për të shmangur të gjithë ata që donin intervista. Jam mbyllur, por kam qenë edhe shumë e ngarkuar me punë, me orë të tëra dhe deri në orët e vona. Ishte dhe është e vështirë, por them se asgjë nuk është e pamundur, kalon”, tha ndër të tjera Shtino.
Nga ana tjetër kurioziteti i të gjithëve është pse nuk transmetohet më “Njerëz të humbur.
“Nuk doja të ndërpritej ‘Njerëz të humbur’ dhe ndërprerja është bërë për fajin tim. Historitë e njerëzve në atë emision më kanë bërë njeri më të mirë. Por kam marrë shumë kërcënime, sidomos kur kërkonim vajza të humbura, pasi hasnim në rrjete trafikantësh.
Një herë në zyrë më kishte ardhur një letër ku shkruhej se vajza që kërkonin ndodhej në adresën e shtëpisë sime. Aty u alarmova dhe kam njoftuar policinë”, tregoi Aida.
Momentalisht Aida është duke punuar për të shkruar një libër me të gjitha historitë që ka dëgjuar gjatë viteve të saja si pjesë e “Njerëz të humbur”.
