Sergey Brin, bashkëthemeluesi i Google, u bëri thirrje punonjësve të punojnë 60 orë në javë, duke shkaktuar reagime dhe shqetësime të forta.
Në një shënim të brendshëm që u publikua, Brin e quajti 60-orëshin “niveli ideal i produktivitetit”. Siç shkruan cronista.com, kjo propozim nënkupton punë 12-orëshe nga e hëna deri të premten ose punë shtatë ditë në javë, duke lënë shumë pak kohë për jetën personale. Për më tepër, ai i quajti ata që punojnë më pak si “të papërshtatshëm dhe demoralizues”.
Brin e lidhi propozimin me garën për zhvillimin e Inteligjencës Artificiale të Përgjithshme, duke argumentuar se konkurrenca është ashpërsuar dhe se Google duhet të “përshpejtojë përpjekjet e saj” për të ruajtur epërsinë. Paradoksi qëndron në faktin se gjigantët e teknologjisë vitet e fundit kanë kryer shkurtime masive të stafit në vend që të forcojnë ekipet.
Studime shkencore kanë treguar se puna përtej 8 orëve në ditë çon në probleme shëndetësore, përplasje në marrëdhëniet familjare dhe ulje të produktivitetit. Megjithatë, beteja për dominim në tregun fitimprurës të inteligjencës artificiale duket se po shpërfill paralajmërimet shkencore.
Qëndrimi i Google
Zyrtarisht, kompania deklaron se rritja e orarit të punës “nuk është në tavolinë”. Megjithatë, brenda saj, presionet ndaj programuesve që merren me projekte të inteligjencës artificiale po bëhen gjithnjë e më të mëdha, gjë që konsiderohet një hap pas në konceptin modern të balancës mes punës dhe jetës personale.
