Aeroporti Ndërkombëtar i Tiranës i ka bërë thirrje Gjykatës së Krujës për profesionalizëm dhe jo bllokim të aktivitetit tregtar të aeroportit.
Reagimi i fundit i TIA vjen pas bllokimi të aktviteteve tregtare në aeroport, një veprim që thuhet se është bërë pa kurrfarë profesionalizmi nga një gjykatëse e vetme.
Në reagim thuhet më tej se një bllokim i tillë ka dëmtuar imazhin kombëtar të aeroportit të vetëm në Shqipëri, duke mos lejuar ringritjen e dyqaneve dhe bareve të reja në shërbim të pasagjerëve, në dëm të shërbimit publik.
Ky vendim për bllokim vjen si një goditje e rëndë për biznesin në një kohë post pandemie, kur sot më shumë se kurrë duhet të ketë një zhillim të aktivitetit ekonomik.
Për më tepër, Tirana International Airport Shpk e argumenton vendimin e gjykatës si të paligjshëm bazuar në Ligjin Nr.9312 datë 11.11.2004 “Për Ratifikimin e Marrëveshjes së Konçesionit ndërmjet Këshillit të Ministrave të Republikës së Shqipërisë dhe Shoqërisë Konçesionare, sipas të cilit “TIA ka të drejtë ekskluzive të zhvillimit tregtar të aeroportit”.
TIA bën me dije se kundër gjyqtares Enkelejda Hoxha është bërë ankesë në Inspektoriatin e Lartë të Drejtësisë, për moskompetencë dhe ushtrim aspak profesional të autoritetit të ligjit.
Po kush është Enkelejda Hoxha?
Emri i gjyqtares së Krujës Enkelejda Hoxha tashmë lidhet me lirimin nga burgu të disa të dënuarve, përmes vendimeve të dyshimta, para se ajo të përballej me Vetingun.
Hoxha u ka hapur dyert e burgut ish-numrit dy të bandës së Durrësit Endrit Dokle, duke i shuar dënimin përjetë, Genc Tafilit, i dënuar për vrasjen e komisarit të Policisë Arben Zylyftari si dhe Ilir Pajës, të cilit i kishte mbetur mbi një vit dënim.
Në një dalje të veçantë për mediat, lirimin e Dolkes, ministrja Etilda Gjonaj, e cilësoi një kambanë alarmi për drejtësinë.
Reagimi i plotë i TIA-s
Tiranë, 8 Qershor 2020 – Aeroporti Ndërkombëtar i Tiranës (TIA) i bën thirrje Gjykatës së së Rrethit Krujë për drejtësi dhe profesionalizëm, pas bllokimit së fundmi të aktiviteteve tregtare nga një gjykatëse e vetme, Zj. Enkeleida Hoxha me 4 masa sigurie, në favor të A&A Group, për operimin e kafeve dhe dyqaneve në aeroport.
TIA është thellësisht e shqetësuar për një sistem të njëanshëm të drejtësisë që po ndodh në gjykatën e Krujës, ku vendimet – jashtë juridiksonit dhe pa asnjë profesionalizëm – kanë dëmtuar ringritjen e dyqaneve dhe bareve të reja në shërbim të pasagjerëve, duke dhënë masa sigurie të njëpasnjëshme dhe të paligjshme në dëm të shërbimit publik dhe të imazhit kombëtar të aeroportit të vetëm në Shqipëri.
Eshtë rast unikal në botë, ku vendimi i Zyrës Përmbaruese i dorëzohet TIA-s përpara vendimit të gjykatës, pa asnjë njoftim paraprak për TIA-n, duke nënkuptuar shpejtësinë e pazakontë dhe kapërcimin e procedurave që në një proces të rregullt dhe ligjor mund të marrin disa ditë.
TIA shpreh keqardhjen për këtë situatë të pashembullt që ndodh një aeroportin e vetëm ndërkombëtar, ku interesat e një grupi të veçantë, më saktë të Administratorit të A&A Group, Zj. Aliona Zeqiri, shihen si objekti i vetëm për diskutim ligjor, ndërkohë që paligjshmëria zbatohet për TIA-n në çdo masë sigurie. Ky fakt i jep udhë uzurpimit të aeroportit me ndihmën e një gjykate, kur dihet që funksioni real i tij është shërbimi ndaj publikut.
TIA bën me dije se ka përcjellë ankesën e saj në Inspektoriatin e Lartë të Drejtësisë kundrejt Zj. Enkeleida Hoxha për moskompetencë dhe ushtrim aspak profesional të autoritetit të ligjit.
Tirana International Airport Shpk dëshiron të sqarojë edhe në interes të publikut, se bazuar në Ligjin Nr.9312 datë 11.11.2004 “Për Ratifikimin e Marrëveshjes së Konçesionit ndërmjet Këshillit të Ministrave të Republikës së Shqipërisë dhe Shoqërisë Konçesionare, “TIA ka të drejtë ekskluzive të zhvillimit tregtar të aeroportit”. Ndaj, përzgjedhja e fituesve të tenderit për baret, restorantet dhe dyqanet, është në të drejtën e zgjedhjes së lirë të TIA-s.
Tirana International Airport është gjithmonë e gatshme për të bashkëpunuar me organet e drejtësisë. Por nëpërmjet kësaj deklarate, TIA bën thirrje se klima e biznesit merr goditje të rëndë, sa herë kjo drejtësi shtrembërohet.
