2020-ta ka qenë një vit i vështirë për të gjithë, por shumë prej nesh ju ka shërbyer për të reflektuar dhe kuptuar se duhet të vlerësojmë gjithçka që na është dhënë si dhuratë, mbi të gjitha jetën tonë. Në të njëjtin përfundim ka arritur edhe Adrola Dushi pas këtij viti kaq të gjatë e të lodhshëm.
Ajo ka bërë një bisedë virtuale me ndjekësit e saj në rrjete sociale dhe ka treguar se si ishte 2020-ta për të.
“Ishte një vit, i cili më bëri të reflektoj shumë dhe të ndihem falënderuese për gjithçka kam”, është përgjigjur modelja.
Ndërsa kur u pyet se cila ka qenë dëshira më e madhe që ka realizuar gjatë këtij viti, Adrola tha: “Pas disa vitesh goxha të trazuara në jetën time dhe që shpesh jam ndjerë sikur kam humbur veten, më në fund kam arritur ta rishoh veten në pasqyrë me dashuri dhe respekt”.
Modelja ka treguar se periudha e divorcit nga bashkëshorti i saj ka qenë shumë i vështirë dhe shpesh është përballur edhe me gjykimin e të afërmve, të cilët e kishin të vështirë ta pranonin këtë fakt për vajzën e tyre.
Ndërkohë e pyetur në lidhje me të bërit nënë në një moshë shumë të re, Adrola është shprehur: “Të jesh nënë është ndjesia më e bukur dhe më e pamposhtur në jetë. E vetmja gjë të cilën e quaj negative nga eksperienca ime është që nuk e kam shijuar kohën e plotë me Troin tim. Gjithsesi tani që ai është rritur dhe kupton më shumë ne jemi bërë shokë të mirë”.
Adrola ka rrëfyer më herët se Troi ka ardhur krejt papritur, sepse ajo dhe ish-bashkëshorti nuk kishin planifikuar që të bëheshin prindër, por ajo asnjëherë nuk është penduar që është bërë nënë shumë më herët nga ç’e kishte menduar.
