Aktorja Adriana Matoshi njoftoi pak ditë më parë se i është rikthyer sërish tumori në tru pas nëntë vitesh dhe sot i duhet të përballet me një sfidë për jetën e saj.
Shumë personazhe të njohur, artistë e qytetarë shprehën mbështetjen për të dhe marshuan ditën e djeshme në Prishtinë, mes tyre edhe këngëtarja e njohur Dafina Zeqiri e deputetë e kolegë të Adrianës. Por një njeri edhe më i veçantë për të e ka shprehur publikisht dashurinë dhe mbështetjen.
I dashuri i Adrianës, futbollisti Keith Groeneveld ka reaguar sërish në rrjetet sociale, duke treguar se është krah aktores në këto momente të vështira për të.
“Zoti është me ty loqka jem. Shihemi së shpejti”, shkruan ai në një postim në Instastory.
Ndërkohë, ditën e djeshme futbollisti ndau një video me aktoren në Instastory ku shkruan se nuk nevojiten fjalët.
Adriana Matoshi e njoftoi të hënën lajmin se asaj i është rikthyer tumori dhe falenderoi mjekët me të cilët ka luftuar sëmundjen këtë herë. Ajo u bëri të gjithëve thirrje ta duan jetën dhe vdekjen dhe u shpreh se çfarëdo që të ndodhte me vullnetin e Zotit e të mjekëve, por nuk do e shpëtonin as paratë e as fama.
