Moderatori dhe gazetari i njohur Adi Krasta ka bërë një deklaratë të fortë mbrëmë në emisionin e tij, “A Show”, ku të ftuar kishte analistin nga Kosova, Rron Gjinovci.
Duke folur për fushatën parazgjedhore që ka nisur tashmë, Krasta dha një lajm sipas tij “spektakolar”, që do të dëgjohet këto kohë. Ai tha se qeveria ka tentuar të blejë me para një nga tre faqet kritike, JOQ, Brryli Broadway dhe Lolita.
Kjo tregon sipas Krastës se tashmë lufta ka zbritur në një nivel tjetër, atij të rrjeteve sociale që kanë edhe një përdorim të gjerë nga mbarë popullsia në Shqipëri.
Ja çfarë tha Krasta më konkretisht:
“Një nga lajmet më spektakolare që do të marrë jetë këto kohë, është tendenca për të blerë me kesh një nga faqet e rëndësishme, një nga të tre faqet që është JOQ, Brryli Broadway dhe Lolita. Njërën nga këto faqe, qeverisja ka tentuar këto kohë ta blejë me kesh. Çka tregon se këtu nuk po luhet me televizione, ka zbritur lufta e fuqia në nivel të asaj që ne i jemi trembur dikur, që janë rrjetet online, Facebook-u, Instagrami e kështu me radhë”.
Rrjetet sociale kanë njohur një përdorim të gjerë propagandistik që ka kaluar tashmë mediat tradicionale, si televizioni, dhe është fokusuar në Instagram dhe Facebook. Kjo sigurisht që do të ndihet edhe më shumë gjatë kësaj periudhe para zgjedhore.
Ndiq videon min 29:40
