40 ditë burg. Ky është vendimi i Gjykatës së Pogradecit për Blerim Bizgjonin, i cili akuzohet se abuzoi seksualisht me të miturën 13-vjeçare në fshatin Vërdovë.
Gjykata nuk vendosi masën burg pa afat për të akuzuarin, por 40 ditë me argumentin se është koha e mjaftueshme për akt ekspertimin mjeko-ligjor të vajzës.
Në përfundim të seancës, avokati i të akuzuarit u shpreh për mediat se Blerim Bizgjoni e mohoi akuzën.
“Është çështje mjaft sensitive. Ai nuk e pranoi akuzën”, tha ai për mediat.
Bizgjoni doli sot para gjykatës me kokën ulur dhe i pajisur me maskë. Ai mohoi akuzat e 13-vjeçares për abuzim seksual, ndërsa ishte vetë vajza ajo e cila e denoncoi dy ditë më parë.
Nëna e saj u shpreh në një intervistë se vajzën ia kishin lënë familjes së 46-vjeçarit në mirëbesim, por ky i fundit abuzoi me të. Vajza qëndronte në shtëpinë e abuzuesit për shkak se ishte shoqe me vajzën e këtij të fundit, por edhe prej pamundësisë ekonomike të familjes së saj.
Bizgjoni u kishte thënë prindërve të vajzës se do të kujdesej për të miturën si të ishte vajza e tij, ndërkohë që i kishte premtuar edhe punë babait të të miturës, i cili vuan nga probleme të shëndetit mendor.
/Abc News
