Teksa viti i ri akademik ka nisur dhe në disa univeristete studentët e pavaksinuar nuk janë lejuar të hyjnë në auditorë, shefja për sëmundjet infektive në ISHP, Silva Bino ka shuar disa dyshime në lidhje me vaksinat anti Covid.
Bino ka thënë se vaksina nuk ka asnjë ndikim në shëndetin riprodhues, si te femrat, ashtu edhe tek meshkujt.
Në një prononcim për A2 CNN, Bino është shprehur se të gjitha të dhënat tregojnë se vaksina nuk ka asnjë efekt dhe kjo vihet re edhe në vendin tonë, pasi vajza dhe gra që janë vaksinuar kanë mbetur shtatzënë.
“Një nga hezitimet e tyre është që, ne jemi të rinj dhe nuk kemi pse të bëjmë vaksinën. Është e vërtetë se Covid kalon me forma të lehta tek të rinjtë, por me shtimin e rasteve mund të kemi forma të rënda dhe vdekje”
“Vaksina nuk ka asnjë ndikim në shëndetin riprodhues, nëse mbetesh shtatzënë apo jo, si për femrat ashtu edhe për meshkujt. Të gjitha këto kanë qenë hamendësime të pabazuara. Të gjitha të dhënat e sotme, eksperimentale, në kafshë apo të dhëna në popullatën e përgjithshme, flasin se vaksina nuk ka asnjë efekt. Kjo vihet re edhe në vendin tonë, personat janë vaksinuar dhe kanë mbetur shtatzënë”, ka thënë Bino.
