Shkalla e vdekshmërisë në banorët e vendeve që kanë kryer vaksinën e tuberkulozit është më e ulët.
Ky rezultat vjen pas një studimi të Universitetit John Hopkins, sipas të cilit mund të shpjegohet edhe kurba e ulët e vdekshmërisë në vendin tonë.
Juna Musa, një mjeke shqiptare në Minesota dhe njëkohësisht Kandidate Shkencore post doktorale, tha në emisionin “Opinion” se shkalla e vdekshmërisë në vendet që kanë gjerësisht imunizimin me vaksinën e tuberkulozit, është 6 herë më e ulët.
“Kjo mund të japë shpjegim përse ne kemi një shkallë vdekshmërie të ulët dhe sasia e infektimit është më e ulët, krahasuar me Francën dhe Italinë. Një tjetër studim i bërë tek amerikanët nativë tregoi që vaksinimi në fëmijëri për tuberkulozin është efektiv dhe mbrojtës edhe 60 apo 70 vite pas vaksinimit”, tha Musa.
Deri tani në vendin tonë janë infektuar 400 persona dhe janë regjistruar 22 viktima nga COVID-19, teksa duket se situata është nën kontroll, krahasuar me vende të tjera si Italia apo Franca, ku bilanci nga koronavirusi është tragjik.
Të paktën prej vitit 1960 Shqipëria e ka patur në protokollin e detyrueshëm vaksinën e tuberkulozit, e cila kryhet tek fëmijët sapo lindin.
Kjo është një vaksinë që është specifike ndaj një bakteri dhe nuk ka lidhje të drejtëpërdrejtë më koronavirusin, por ka pasur rezultate pozitive në ato vende ku është ndjekur me protokoll.
/Opinion
