Një zemër e lënduar nga një zhgënjim, humbja e një personi të dashur, apo një gabim, një histori që do ta kalosh dhe t’ia nisësh nga e para! Për këtë flet seriali i sotëm i përzgjedhur për rubrikën javore nga iconstyle.al!
“Virgin River” (2019), është një pasqyrë për të gjithë ata njerëz që duhet të lënë historinë e shkuar pas, dhe të nisin një të re! Në qendër të serialit është Melinda Monroe (Alexandra Breckinridge), një mjeke që punon në Cedars Sinai në Los Angeles, por largohet nga qyteti i saj për të punuar si infermiere në një qytet të vogël, shumë larg që quhet Virgin River!
Por ndonëse seriali nis me përpjekjet e saj për t’a hedhur të shkuarën pas, ajo e përndjek nga mbrapa!
Bukuria e liqenit dhe maleve përreth Virgin River, apo banakieri simpatik Jack që gjithashtu ka disa sekrete, nuk i shuajnë kujtimet e saj për partnerin Mark (Daniel Gillies) të cilat janë aq të dhimbshme saqë i kthehen në makth.
Çfarë ka ndodhur me jetën e tyre dhe përse Melinda u largua e vetme nga LA?
Sikur të mos mjaftonte e shkuara problematike, Melinda e nis me këmbën e gabuar jetën e saj në Virgin River, California.
Që në nisje të serialit, kur BMW-ja e saj del nga rruga, asaj i vjen në ndihmë një zotëri i moshuar. Ajo i thotë atij se është punësuar nga kryetarja e bashkisë së qytetit për të punuar me Doktorin Mullins, i cili po plaket dhe ka nevojë për ndihmë. Në atë moment i moshuari i prezantohet dhe i thotë se është doktori në fjalë, Mullins (Tim Matheson). I inatosur që i përmendi moshën (ai është vetëm 72) largohet për të mbajtur një qëndrim të ftohtë dhe refuzues ndaj saj në punë që do t’ia nxijë jetën!
Kryetarja e bashkisë, Hope McCrea (Annette O’Toole), i vjen në ndihmë duke i siguruar një kabinë ku të jetojë, që në fakt lë për të dëshiruar. E tronditur nga pamja e kabinës së vjetër, Melinda shkon në barin e vetëm të qytetit ku takohet me pronarin Jack Sheridan (Martin Henderson) me të cilin le të themi që e nis me këmbë të mbarë. Ai zotohet që ta ndihmojë me rindërtimin e kabinës, dhe sikur të mos mjaftonte kjo e fton edhe të dalin bashkë! Do të jetë e thjeshtë për Melindën për të dalë në një takim, pas asaj që i ka ndodhur?
Gjërat më pas në serial rrjedhin qetë! Peisazhet e mrekullueshme e bëjnë shikuesin të ruajnë atë gjendjen e qetësisë.
Por personazhet hasin edhe probleme të vështira dhe pikëpyetje në zemrat e tyre. Foshnja të braktisura në pragjet e derës, rrëmbime dhe sëmundje, janë pika më kulmore dramatike e “Virgin River”, i cili duket sikur të garanton që në fillim se gjërat do të shkojnë mirë edhe pse të mban lidhur për të parë zgjidhjen e tyre!
I bazuar në novelën me të njëjtin titull të Robyn Carr, filmi sjell një kast të përzgjedhur mirë: Martin Henderson (Bride and Prejudice, Grey’s Anatomy) si Jack Sheridan; Tim Matheson (Hart of Dixie) që luan rolin e doktorit, Annette O’Toole (Smallville) kryebashkiakia, apo Daniel Gillies (The Originals) si ish-bashkëshorti i Melindës.
Kështu që, nëse i pëlqeni serialet si Hart of Dixie, Gilmore Girls, Cedar Cove, ose Everwood, ky serial është për ju.
“Virgin River” ka një cilësi të lartë prodhimi, histori të mirë, personazhe tërheqëse dhe talent të nivelit të lartë. Sezonin e parë e gjeni në Netflix dhe faqet pirate online, por seriali është rinovuar për një sezon të dytë që për shkak të pandemisë, ashtu si çdo film tjetër, është shtyrë për në vitin 2021.
