Kryeministri Edi Rama ka zbuluar sot se kush e drejton Komitetin e Ekspertëve për përballimin e pandemisë, në një mbledhje ku morën pjesë mjeku Tritan Kalo, Andi Koraqi, Najada Çomo, Sila Bino, Albana Fico, Skënder Brataj, Mira Rakacolli, ministrja Ogerta Manastirliu.
“Doktoreshë Mira Rakacolli merre fjalën si kreu i Komitetit që je, meqë na çmenden këta se kush është kryetari i komitetit. Se ata thonë kush është kryetari. E donin burrë, po ne suksesin e kemi me gratë”, tha Rama.
Komiteti i Ekspertëve u dha përgjigje disa pyetjeve që i shqetësojnë të gjithë në këtë kohë pandemie. Kështu, ata folën për zërat se virusi ka qarkulluar më herët në Shqipëri, që nga janari.
“Në janar ka patur fluks me viroza. Që në fund të muajit janar kërkuam tamponë. Vëmendja jonë ishte me Kinën sepse ishim në lidhje me Kinën. Në janar dhe shkurt s’kishim raste të shtuara. A kanë qenë pneumoni? Por s’mund të kishim pak raste kur s’kishim masa. Nuk kishte raste me COVID, e kemi patur në monitorim”, u shpreh Najada Çomo, shefja e Infektivit.
Tritan Kalo u shpreh gjithashtu se “nuk do të kemi kthim të valës së madhe të COVID në vjeshtë, por do të jetë i përzierë me infeksione të tjera”.
“Në vjeshtë, qarkullojnë dhe 3 viruse të tjera. Pra do të jetë përzierje të infeksioneve. Për sa kohë nuk kemi një antiviral, një vaksinë, do jetë infeksioni që do të bëjë imunizimin dhe më pas popullata do të bëjë shkëputjen e zinxhirit. Them se jemi në momente oportune që duhen ruajtur”, tha Kalo.
