Qeveria shqiptare ka sqaruar të gjithë qytetarët lidhur me përgjimin që mund t’u bëhet telefonave të secilit. Këto dyshime i hodhi ish-Kryeministri Sali Berisha, i cili akuzoi se shqiptarët përgjohen nga shteti përmes numrit të telefonit 50505. Po a përgjohen vërtet telefonat tanë?
Në një deklaratë në faqen “Transparenca.al”, qeveria thotë se numri 50505 është numër që shërben për të marrë vlerësimet e qytetarëve mbi shërbimet e ndryshme publike. “Të dhënat e përdoruesit që shfaqen në mesazhet hyrëse nga ky numër dhe numri i telefonit janë deklaruar vullnetarisht nga qytetarët në momentin e regjistrimit për marrjen e shërbimeve publike”, shkruan deklarata. “Gjithashtu, qytetarët janë vënë në dijeni për përdorimin e tyre për qëllime të mbledhjes së opinioneve të ndryshme për shërbimet publike, në funksion të përmirësimit dhe rritjes së performancës në ofrimin e tyre”, shton më tej deklarata.
Qeveria siguron se asnjë e dhënë tjetër e qytetarëve nuk trajtohet nga sistemi. “Sistemi funksionon prej dy vjetësh dhe mijëra qytetarë kanë marrë SMS si dhe na janë përgjigjur me sugjerime të vlefshme për përmirësimin e shërbimeve publike, në kuadër të programit të luftës kundër korrupsionit në sportelet e zyrave të shtetit.
Për vitin 2016, janë ndërmarrë 56 fushata me SMS, duke kontaktuar gjithsej 139,476 qytetarë, me një normë përgjigje mesatare 27%. Qytetaret përfitues të shërbimit publik kanë pasur mundësi të shprehin pa rezerva mendimin e tyre, duke vlerësuar, ose ankimuar eksperiencën e tyre.
Ndërkohë që përpara disa ditësh, sistemi ka pësuar një avari, duke nisur mesazhe të pakuptimta në numra që qytetarët kanë vetë deklaruar në çastin e marrjes së shërbimit publik, qoftë për vete, apo për të afërmit e tyre. Për të stabilizuar situatën deri në verifikimin e problemit sistemi është mbyllur e më pas, në bashkëpunim me operatorët telefonik, janë nisur rreth 50,000 SMS për të sqaruar këta qytetarë mbi SMS-të e pakuptimta”, përfundon ajo.
