“Demokracia është në krizë”. Kështu thuhet në deklaratën e “Freedom House” pas raportit të indeksit të lirisë në botë për 2018-n, të realizuar nga OJQ-ja, por të financuar nga qeveria amerikane.
“Vlerat që mishërojnë – veçanërisht të drejtën për ta zgjedhur udhëheqësit me zgjedhje të lira dhe të ndershme, lirinë e shtypit dhe sundimin e ligjit – po sulmohen në nivel global. Një çerek shekulli më parë, në fund të Luftës së Ftohtë, u duk se totalitarizmi më në fund u mund dhe demokracia kishte fituar betejën e madhe ideologjike të shekullit të 20-të. Sot, është demokracia që e gjen veten të goditur dhe të dobësuar”, thuhet në raport.
Për vitin e 12-të të njëpasnjëshëm, vendet që po përjetojnë një pengesë demokratike tejkaluan ato që shënuan rritje të lirisë. Raporti deklaroi se 88 vende u klasifikuan si “të lira”, ndërsa 49 u klasifikuan si “jo të lira”.
Në raport thuhet se Shqipëria është pjesërisht e lirë, me 68 pikë nga 100 (për vendin më të lirë).
Vlera e lirisë për kategori të ndryshme (ku 1 është më i lirë dhe 7 është më pak i lirë) varion kështu:
Liria e vendit: 3
Të drejtat politike: 3
Liritë civile: 3
I njëjti vlerësim nga “Freedom House” është realizuar për Shqipërinë edhe në vitin e kaluar, duke treguar se brenda një viti të drejtat dhe liritë e qytetarëve kanë mbetur në vend.
Ndërsa Kosova ka marrë 52 pikë, duke u vlerësuar me 3.5 pikë për lirinë e vendit, 3 pikë për të drejtat politike dhe 4 pikë për liritë civile.
Vendi më i shtypur në botë është Siria, më pas Sudani i Jugut, Eritrea, Koreja e Veriut, Turkmenistani, Guinea Ekuatoriale, Arabia Saudite, Somalia, Uzbekistani, Sudani, Republika Afrikane dhe Libia.
Burimi: Independet
