Protesta e studentëve të universiteteve publike ka kaluar në ditën e saj të nëntë sot, ndërkohë që ende nuk po gjendet një zgjidhje e kërkesave të tyre drejtuar Ministrisë së Arsimit dhe qeverisë.
Studentët e nisën sot protestën më të bashkuar se kurrë para Kuvendit, aty ku u mbajt seanca plenare. Kryeministri Edi Rama është shprehur i gatshëm për të ofruar kushte më të mira për studentët dhe për të përmbushur kërkesat ndërsa prej ditësh tashmë i fton ata për bisedime.
Por sipas studentëve, 8 pikat e tyre janë të panegociueshme ndërsa kanë paralajmëruar vijimin e protestës. “Iconstyle.al” mbajti një sondazh dje në lidhje me çështjen që po i trazon të gjithë:
A duhet të ulen studentët për bisedime me qeverinë?
61% e pjesëmarrësve në sondazh votuan kundër bisedimeve, duke kërkuar plotësim të të gjitha kërkesave të studentëve pa kushte.
Sa i përket fatit të protestës dhe mënyrës së si do të mbyllet ajo, 54% e pjesëmarrësve në sondazh u shprehën se në fund, qeveria do të dorëzohet, ndërsa 34% shpresojnë për një dialog mes studentëve dhe kryeministrit Rama.
/Iconstyle.al
