Kepi i Rodonit do të jepet me koncesion për ndërtimin e një porti jahtesh.
Lajmi është dhënë sot nga “RTV Ora” sipas së cilës, Ministria e Infrastrukturës ka hapur garën për projektin më të mirë.
Por ekspertët mjedisorë kanë dalë kundër këtij vendimi, pasi sipas tyre Kepi i Rodonit duhet të kthehet në një zonë të mbrojtur detare.
Ambientalisti Abdulla Diku thekson se Shqipëria duhet të plotësojë standardet për zonat detare të mbrojtura, ndërsa shton se kjo zonë është shpallur edhe Monument Natyre.
“Fare mirë mund të ishte një zonë e mbrojtur detare duke qenë se zona të tilla mjedisore në Shqipëri kemi vetëm një, Sazan-Karaburun. Zona ka ndjeshmëri të lartë mjedisore”.
Për ish-kreun e Agjensisë së Bregdetit, Auron Tare, portet e jahteve në Shqipëri janë të rëndësishëm për turizmin, por para se të miratohen projektet është e nevojshme të kryhen studime të mirëfillta për të gjetur zonat e duhura:
“Shqipëria nuk ka traditë për këtë, është e rëndësishme marrja e ekspertizës më të mirë botërore për të bërë diçka që të konkurrojë fqinjët tanë në nivelin e shërbimeve dhe të cilësisë së ngritjes së këtyre porteve”.
Burime të “RTV Ora” kanë bërë të ditur se me propozim të kërkuar, parashikohet që Kepi i Rodonit të jepet me koncesion për 35 vite me qëllim ndërtimin e një porti të Jahteve.
