Pas alarmit që u përhap se pjepri në Shqipëri rritej me substanca kancerogjene, ka reaguar Autoriteti Kombëtar i Ushqimit (AKU).
Sipas deklaratës zyrtare, në media është krijuar panik i panevojshëm dhe fiktiv për konsumatorët.
“Autoritetit Kombëtar i Ushqimit informon se nuk ka vend për alarm. Gjatë këtij viti kemi thuajse pesëfishuar eksportet tona në vendet e BE dhe jo vetëm, si dhe nuk kemi asnjë ngarkesë fruta-perimesh të kthyer mbrapsht në vendin tonë për arsye të nivelit mbi normën e lejuar të mbetjeve (nitrateve) në këto produkte (konkretisht pjepër)”, shprehet konkretisht.
AKU shton më tej se ajo që u paraqit në media, më konkretisht në “TV Klan”, nuk përmban as detaje të integritetit dhe gjurmimit të mostrës së produktit (konkretisht, vendin e origjinës pra prodhuesin/fermerin, subjektin tregtues, kushtet e ruajtjes, detaje të dokumentacionit shoqërues mbi këtë produkt), si dhe as besueshmërinë në përdorimin e aparatit dhe saktësinë e tij në matje.
Madje aparati që përdoret për të parë nivelin e nitrateve në produkt, nuk është i destinuar për përdorim në laborator, por për përdorim individual privat.
“Aparati nuk është i destinuar për efekt kontrolli zyrtar për vetë specifikën që paraqet, jo në përputhshmëri me metodën standarde ISO të unifikuar dhe validuar”, thuhet në njoftim.
