Këtë të enjte, Kuvendi pritet të votojë projektligjin për shembjen e godinës së Teatrit Kombëtar dhe lejen për ngritjen e një godine të re.
Ndërkohë, artistët janë mbledhur në protestë kundër miratimit të këtij projektligji përpara Parlamentit.
Aktori Neritan Liçaj në emër të artistëve, kërkoi që Avokatja e Popullit të verifikojë ligjshmërinë e gjithë këtij procesi.
“Ne jemi kundër këtij ligji, jemi kundër shembjes së Teatrit. Ky projekt ligj vjen në kundërshtim me disa ligje të tjera në Republikën e Shqipërisë”, deklaroi aktori.
Ndërsa aktori Bujar Asqeriu u kërkoi deputetëve të bëjnë kujdes me atë që do të vendosin sot:
“Kini kujdes! Mos luani me artistët! Artistët i kanë dhënë flakë dhe zjarr këtij vendi, ndaj kujdes me artistët! Kalojeni këtë nen në zemrën dhe shpirtin tuaj, psikologjikisht, emocionalisht dhe shpirtërisht dhe do të kuptoni në ndërgjegjen tuaj se po gaboni. Mos e kafshoni Teatrin. Ju bëjmë thirrje për herë të fundit”.
Burimi: Noa
