Një artist në Londër, Philip Colbert, ju ka krijuar mundësinë të gjithë njerëzve të ndjekin një ekspozitë në një galeri përmes disa robotëve të lidhur me smartphone-t e njerëzve. Çdokush që nuk mundet të udhëtojë drejt Londrës për të parë ekspozitën për shkak të pandemisë, mund ta vizitojë atë lehtësisht nga robotët kudo ku ndodhet.
Por a do të na çojë pandemia e koronavirusit më shpejt drejt realitetit virtual?
Iv Tase, ekspert i kësaj fushe, shprehet në një prononcim për “iconstyle.al” se realiteti virtual (VR) nuk është krijuar për të distancuar njerëzit, por ju jep atyre mundësinë që të jenë fizikisht në mënyrë virtuale në çdo vend që dëshirojnë.
Përmes teknologjisë virtuale interaktive njerëzit mund të bëjnë jo vetëm tur rreth një vendi të caktuar, por mund të ketë edhe interaktivitet. Tase sjell dy shembujt “TimeLooper” (njerëzit mund të vizitojnë virtualisht një vend, apo të udhëtojnë pas në kohë) dhe “Tourmake”(viziton showroomet, merr informacione rreth produkteve të ndryshme, merr shërbim online), të cilët zëvendësojnë totalisht gjithë impaktin që njerëzit marrin kur janë vetë të pranishëm fizikisht diku.
Iv Tase thotë për “iconstyle.al” se realiteti virtual ka pasur një impakt pozitiv sidomos tek bizneset në këtë kohë pandemie. Ai shprehet se për shkak të koronavirusit nuk mund të qëndrojnë më 30-40 persona brenda një dyqani, por me shërbimin e realitetit virtual bizneset mund të marrin nga 10 mijë vizita në dita. Kjo është një diferencë shumë e madhe dhe sigurisht që ndikon drejtpërdrejt tek zhvillimi i bizneseve, që duan apo nuk duan duhet të përshtaten me kushtet e reja. Tase shton se ky është vetëm fillimi i realitetit virtual, sepse pas 5-10 vitesh gjithçka do të jetë e bazuar tek VR.
A mund ta zëvendësojë realitetin tonë VR?
Iv Tase thotë se realiteti virtual nuk mund të zëvendësojë kurrë praninë fizike, konkreten, por ai shërben për të fituar më shumë kohë dhe për të ndihmuar bizneset. Ai nuk harron të përmendë edhe muzetë virtualë, projekt i Ministrisë së Kulturës, duke e cilësuar këtë gjë si një gafë të madhe.
“Ministria e Kulturës ka bërë një gafë duke hapur një tender, ‘të virtualizojmë muzetë’. Nëse virtualizon muzetë dhe turisti i shikon me një klikim mbaron gjithë kurioziteti. Praktikisht ke ulur gjithë mundësitë e blerjes së biletave, i ke hequr të ardhurat si shtetit shqiptar, si ministrisë”, shprehet Tase.
Ai shton se kjo është diçka shumë e dëmshme për logjikën e muzeve, sepse shuhet kurioziteti dhe që të mos ndodhë kjo gjë turi i muzeve duhet të ndërpritet tek dera dhe kushdo që dëshiron ta vizitojë virtualisht brenda duhet të blejë një biletë online. Ose sipas tij përmes realitetit virtual duhet të ofrohet një shërbim tjetër, që ti nuk mund ta marrësh kur je fizikisht në një muze, si për shembull të udhëtosh në histori apo të flasësh me një statujë.
