Që pas lajmit se Melania Trump nuk do të zhvendoset menjëherë në Uashington, kur bashkëshorti i saj të hyjë në Shtëpinë e Bardhë, nisën spekulimet se vajza më e madhe e Donald Trump, Ivanka, do të marrë rolin zëvendësues të Zonjës së Parë.
Por ishte vet Ivanka që mohoi kategorikisht këto thashetheme gjatë një interviste në emisionin “Good Morning America”. “Ka një Zonjë të Parë dhe ajo do të bëjë gjëra të jashtëzakonshme”, u shpreh Ivanka.
Intervista nuk është publikuar ende, por moderatorja Deborah Roberts u shpreh se Ivanka i kishte thënë që spekulimet për rolin e saj në “Shtëpinë e Bardhë” ishin seksiste. “Mendoj se është një vëzhgim i papërshtatshëm”, shprehet Ivanka.
Më herët këtë muaj u konfirmua se vajza e madhe e Donald Trump nuk do të punësohet në “Shtëpinë e Bardhë”, pavarësisht se ajo ka dhënë dorëheqjen nga roli i saj në Organizatën Trump dhe nga marka e saj e modës. Bashkëshorti i saj, Jared Kushner, është emëruar si këshilltar i presidentit të zgjedhur.
Burimi: Cosmopolitan
