Viti 2017 do të jetë një vit i lumtur për disa nga femrat e njohura të ekranit shqiptar, që pritet të bëhen nëna. Disa i ndajnë vetëm pak javë nga ardhja në jetë e fëmijës së tyre, ndërsa disa të tjera muaj. “ICONstyle” ju risjell të famshmet shqiptare që pritet të bëhen nëna këtë vit:
Altuna Sejdi
Altuna Sejdi i surprizoi të gjithë fansat kur zbuloi tek “E diela shqiptare” se është në pritje të një fëmije me partnerin Patris Berisha. Ajo kishte vetëm pak kohë që ishte ndarë nga reperi Cozman, ndërsa përflitej edhe për një lidhje me këngëtarin e ri Ylli Limani. Por këto thashetheme morën fund në momentin që Tuna konfirmoi shtatzëninë dhe Patrisi nisi të publikonte foto me të, duke shprehur gëzimin që do të bëhej baba shumë shpejt. Xhaxhai i fëmijës, Robert Berisha zbuloi dy ditë më parë se ky fëmijë do të jetë trashëgimtari i parë i familjes dhe se kanë mbetur vetëm 4 javë nga lindja e tij.
Adelina Ismaili
Adelina Ismaili është në pritje të një vogëlushi me partnerin e saj Vali dhe brenda pak javëve pritet të sjellë në jetë fëmijën e saj të parë. Bukuroshja e ekranit shqiptar zbuloi pak ditë më parë gjininë e foshnjës për emisionin “NIN” të Klan Kosovës. Ajo tha se është në pritje të një djali dhe se data e lindjes pritet t’i caktohet shumë shpejt: “Gjinia e fëmijës është djalë. Për mua është e çuditshme, sepse ne nuk kemi pasur vëlla dhe me të vërtetë është ndjenjë e papërshkrueshme. Ende nuk mund të adaptohem me idenë se është një djalë i vogël këtu brenda meje”, është shprehur Adelina.
Jorida Tabaku
Deputetja demokrate Jorida Tabaku zbuloi surprizën e bukur se do të bëhej nënë, në çadrat e protestës së Partisë Demokratike, që po zhvillohet përballë kryeministrisë. Jorida tregoi barkun e rrumbullakët dhe të gjithë u çuditën kur ajo zbuloi se është në muajin e pestë dhe do të sjellë në jetë jo një, por dy vajza të bukura.
Ryva Kajtazi
Këngëtarja kosovare, Ryva Kajtazi është gjithashtu shtatzënë dhe së shpejti do të bëhet nënë për herë të parë. Për herë të parë ajo e dha lajmin për emisionin ‘Prive’, ku edhe zbuloi gjininë e fëmijës së saj të parë. Ryva do të bëhet nënë e një vajze, ndërsa për emrin e fëmijës çifti ende nuk kanë vendosur.
Majlinda Zeka
Ish-e dashura e reperit shqiptar Majk është bërë e njohur pikërisht nga lidhja me këtë të fundit. Majlinda Zeka ishte goca brune bukuroshe, me të cilën reperi postonte foto në rrjetet sociale, deri në momentin kur mediat nisën të shkruanin për një vizitë në spital të çiftit. Dhe në fakt fjalët ishin të vërteta. Majlinda konfirmoi shtatzëninë në “Instagram”, ku shkroi se është në pritje të një djali, ndërsa reperi Majk fshiu të gjitha fotot me të nga “Instagrami”, duke lënë të kuptohet se gjithçka mes tyre kishte marrë fund.
Burimi: ICONstyle
