Pas ndryshimit të transportit urban, në Tiranë do të ndodhë një tjetër risi. Flitet për pagesën e faturës së parkimit të automjetit vetëm nëpërmjet një sms-je.
Siç njoftoi kryebashkiaku Erion Veliaj, nëpërmjet një postimi në “Facebook”, tashmë mjafton të parkoni makinën, të dërgoni numrin e targës në numrin 50500 dhe nga krediti në celularin tuaj do të merren automatikisht paratë për 1 orë parkim.
Projekti fillimisht përfshin rrugën “Myslym Shyri”, “Ibrahim Rugova” dhe bulevardin “Dëshmorët e Kombit” dhe në të ardhmen, mund të përfshijë të gjitha zonën A.
“Gjithashtu, edhe kontrolli i targave do të bëhet në mënyrë elektronike. Secili prej inspektorëve të Tirana Parking ose Policisë Bashkiake pajiset me një aparat, me të cilin kontrollon targat e mjeteve që e kanë paguar ose jo parkimin. Ata fusin numrin e targës dhe menjëherë shohin sa minuta i kanë mbetur qytetarit deri sa të lirojë vendin për një qytetar tjetër, që gjithashtu ka nevojë të parkojë”, u shpreh Veliaj.
